O‘zbekiston Respublikasi Prezidentining 2024-yil 23-sentyabrdagi PQ–330-sonli qaroriga muvofiq, 2025-yil yakuniga qadar mamlakat bo‘yicha kambag‘al oilalarning 3–7 yoshli farzandlarini maktabgacha ta’lim bilan qamrab olish darajasini 80 foizga yetkazish maqsadi belgilangan. Mazkur topshiriq ijrosini ta’minlash maqsadida 2025-yil 12-fevralda Vazirlar Mahkamasining “2025–2026 yillarda bolalarni maktabgacha ta’lim bilan qamrab olish darajasini oshirish bo‘yicha qo‘shimcha chora-tadbirlar to‘g‘risida”gi 83-son qarori qabul qilingan.

Ushbu qaror ijrosini joylarda nazorat qilish va amaliy holatni o‘rganish maqsadida Ishtixon tumanidan Xalq deputatlari Kengashining 24-Qulchara saylov okrugidan saylangan deputat Xudayberganova Gulpashsha Sharipovna tomonidan tuman hududida o‘rganish ishlari olib borildi.

O‘rganishlar davomida maktabgacha ta’lim muassasalarining bugungi holati, mavjud imkoniyatlar, kambag‘al oilalar bilan ishlash samaradorligi chuqur tahlil qilindi. Jumladan, 3–7 yoshli bolalarni maktabgacha ta’lim bilan qamrab olish darajasini oshirish uchun hududiy shart-sharoitlarni hisobga olgan holda qo‘shimcha chora-tadbirlar zarurligi ta’kidlandi.

Xususan, aholining to‘lov qobiliyati yuqori bo‘lgan, kambag‘al oilalar soni kam bo‘lgan mahallalarda davlat-xususiy sheriklik asosida nodavlat maktabgacha ta’lim tashkilotlarini tashkil etish samarali yo‘l sifatida ko‘rsatildi. Aholisi oz, hududi olis va chekka joylarda esa oilaviy nodavlat maktabgacha ta’lim tashkilotlarini tashkil etish zarurligi qayd etildi.

Deputat ta’kidlaganidek, bu kabi chora-tadbirlar maktabgacha ta’lim bilan qamrovni kengaytirish, ayniqsa, kambag‘al oilalarning farzandlariga sifatli ta’lim olish imkoniyatlarini yaratishda muhim ahamiyat kasb etadi.