Bugungi kunda deputatlarning mahalla yettiligi bilan hamkorlik qilishi joylardagi muammolarning o‘z yechimini topishiga xizmat qilmoqda. Shu maqsadda Xalq deputatlari Parkent tuman Kengashiga 15-Beshkappa saylov okrugidan saylangan deputat, tuman Kengashi kotibiyati mudiri Berdiqulova Mavluda Tojiddinovna hamda Xalq deputatlari Parkent tuman Kengashiga 13-Istiqbol saylov okrugidan saylangan deputat Mahmudova Baxtinisa Zuxriddinovnalar tomonidan tumanimizdagi “Istiqbol” mahallasida mahalla yettiligi bilan uchrashuv tashkil etildi. Bu ushrashuvdan maqsad aholini qiynab kelayotgan muammolarni bevosita o‘rganish, taklif va tashabbuslarini eshitish hamda ularni tegishli tashkilotlar bilan hamkorlikda hal etishdir. Tadbir davomida mahalla yettiligi tomonidan o‘z yo‘nalishlari bo‘yicha ichimlik suvi ta’minoti, elektr energiyasi, yo‘l infratuzilmasi, bandlik, tibbiy xizmat sifati va ijtimoiy himoya masalalari yuzasidan fikr va takliflar bildirildi. Deputatlar har bir masala yuzasidan tegishli izohlar berib, muammolarni hal etish bo‘yicha mas’ul tashkilotlar bilan hamkorlikda ish olib borilishini ta’kidladi. Shuningdek, uchrashuv davomida amaldagi qonunlar, davlat dasturlari va aholi uchun yaratilayotgan imkoniyatlar haqida ham atroflicha ma’lumot berildi.