Shu kunlarda butun mamlakatimiz bo‘ylab harbiy-vatanparvarlik mavzusida turli madaniy-ma’rifiy va ommaviy sport tadbirlari o‘tkazilmoqda.
Xalq va armiya yakdilligini ta’minlashga xizmat qiladigan ana shunday tadbirlar DXX Chegara qo‘shinlari harbiy qism va bo‘linmalarida ham uyushqoqlik bilan tashkil etilmoqda. Jumladan, Toshkent va Qashqadaryo viloyatlarining Bekobod va Qarshi shaharlarida joylashgan DXX Chegara qo‘shinlariga qarashli harbiy qismlar o‘rtasida o‘tkazilgan “Askar onalarini sharaflaymiz” mavzusidagi videomuloqotda chegara hududlarida muddatli harbiy xizmatni o‘tayotgan askarlar jam bo‘lib, ota-onalari, yaqinlari, sinfdoshlari va ustozlari bilan dildan suhbat qurdilar.
Tadbirda Xalq deputatlari Bekobod shahar kengashi deputati U.Abdunazarov ishtirok etib, harbiylikning sharafi va mas’uliyati, muddatli harbiy xizmatchilar uchun yaratilayotgan shart-sharoit va qulayliklar hamda berilayotgan imtiyozlar xususida so‘z yuritib, askarlarning ukalari, sinfdosh va tengdoshlari qalbida harbiylikka bo‘lgan havasning yanada ortishiga xizmat qilishini ta’kidlab o‘tdi.