Xalq deputatlari Payariq tumani kengashi deputati Kosimova Saodat tomonidan 25- va 27-maktablarning 2025–2026-o‘quv yiliga tayyorgarlik holatini o‘rganish maqsadida amalga oshirilgan tashrifi alohida e’tiborga loyiq. Ushbu tashabbus joylardagi ta’lim muassasalarining holatini bevosita o‘rganish, mavjud muammolarni aniqlash va ularni bartaraf etishga yo‘naltirilgan amaliy yondashuv namunasi sifatida qaralmoqda.  

 Deputat tomonidan maktab infratuzilmasi, o‘quv jarayoniga tayyorgarlik, moddiy-texnik baza, darsliklar bilan ta’minlanganlik, xavfsizlik choralarining ko‘rilganligi kabi masalalarga e’tibor qaratilgani maktab jamoalari va ota-onalar orasida ijobiy baholandi. Ayniqsa, yangi o‘quv yiliga puxta tayyorgarlik ko‘rish orqali bolalarga sifatli ta’lim-tarbiya berish uchun zamin yaratilayotgani quvonarli holatdir. 

 Ta’lim –jamiyat taraqqiyotining poydevori. Shu bois, maktablarning holatiga befarq bo‘lmasdan, ularni muntazam nazorat qilish, kamchiliklarni o‘z vaqtida bartaraf etish borasida deputatlar tomonidan olib borilayotgan bunday faoliyat albatta maqtovga loyiq. Bu nafaqat maktab rahbariyatini, balki mahalliy hokimiyat, ota-onalar hamda keng jamoatchilikni ham ta’lim muammolariga befarq bo‘lmaslikka undaydi.