Xalq deputatlari Payariq tumani Kengashi deputati O‘ktam Omonov o‘z saylov okrugi bo‘lgan “Do‘stlik” mahallasida istiqomat qiluvchi fuqarolar bilan navbatdagi uchrashuvini o‘tkazdi.

Uchrashuvda deputat o‘tgan davr mobaynida amalga oshirilgan ishlar, muammolarni bartaraf etish yo‘lida ko‘rilgan chora-tadbirlar hamda mahalla rivojiga qaratilgan loyihalar haqida atroflicha ma’lumot berdi. Jumladan, mahalladagi ichki yo‘llarning ta’mirlanishi, ijtimoiy infratuzilma holatini yaxshilash, yoshlar bandligini ta’minlash borasidagi tashabbuslari haqida to‘xtalib o‘tdi.

Shuningdek, deputat kelgusida amalga oshirilishi rejalashtirilayotgan ishlarga ham e’tibor qaratdi. Xususan, mahallada qo‘shimcha sport maydonchasi qurish, maktab infratuzilmasini yaxshilash va ichimlik suvi ta’minotini yanada samarali yo‘lga qo‘yish borasida saylovchilar bilan fikr almashildi.

Uchrashuv davomida fuqarolar deputatga o‘zlarini qiziqtirgan savollar bilan murojaat qilishdi. Aholi tomonidan ko‘tarilgan muammolar deputat tomonidan yozib olinib, tegishli tashkilotlar bilan hamkorlikda hal etilishi ta’kidlandi.

Bunday ochiq muloqotlar mahalla aholisining ijtimoiy faolligini oshirish, deputat bilan bevosita fikr almashish va amaliy takliflar berish imkoniyatini yaratmoqda.