Aksiyaning asosiy maqsadi – bolalar salomatligini asrash, tibbiy muassasalar zaxirasini to‘ldirish va ijtimoiy faollikni oshirish orqali aholida xayriya madaniyatini rivojlantirishdir. Bu tashabbus doirasida bugungi kunga kelib 30 nafardan ortiq fuqaro ko‘ngilli tarzda qon topshirdi.

– Donorlik – bu nafaqat ezgu amal, balki jamiyat oldidagi burchdir. Ayniqsa, bolalar hayotini saqlab qolish uchun har bir tomchi qon qadrli, – deydi aksiyada ishtirok etganlardan biri, faol fuqarolardan Murodjon Yo‘ldoshev.

Aksiya davomida shifokorlar va tibbiyot xodimlari tomonidan qon topshiruvchilarga zaruriy maslahatlar berildi, salomatliklari tekshirildi. Tadbir tashkilotchilari har bir ishtirokchiga minnatdorchilik bildirgan holda, ularning bu xayrli ishini boshqalarga namuna sifatida ko‘rsatdilar.

Mazkur donorlik aksiyasi “Adolat” SDPning aholining sog‘lig‘ini asrash va bolalarni himoya qilish borasidagi faoliyatidagi navbatdagi amaliy qadamlardan biri sifatida e’tirof etiladi. Aksiya yaqin kunlarda ham davom etishi rejalashtirilgan.

Muhim jihati shundaki, bunday tadbirlar fuqarolarning sog‘lom turmush tarziga bo‘lgan e’tiborini oshiradi, jamiyatda mehr-oqibat va hamjihatlik muhitini mustahkamlaydi. Zero, bir tomchi – bir hayotni saqlab qolishi mumkin.