“Tinchlik va taraqqiyot — avvalo, iqtisodiy hamkorlik bilan o‘lchanadi” — Shavkat Mirziyoyev
Bugun Ozarbayjonning Xonkendi shahrida bo‘lib o‘tgan Iqtisodiy hamkorlik tashkiloti sammitida Prezident Shavkat Mirziyoyev mintaqaviy hamkorlikni kuchaytirishga qaratilgan bir qator aniq va amaliy tashabbuslar bilan ishtirok etdi.
Davlatimiz rahbari nutqida Afg‘onistonning mintaqaviy tinchlik va taraqqiyotdagi rolini e’tirof etib, Janubiy Osiyo va Yaqin Sharqdagi notinch vaziyatlar barcha uchun umumiy xavf tug‘dirayotganini ta’kidladi.
Prezident tomonidan quyidagi tashabbuslar ilgari surildi:
* “Hamkorlikning strategik maqsadlari – 2035” konsepsiyasini qabul qilish;
* Toshkentda IXT savdo vazirlari uchrashuvini o‘tkazish;
* Qishloq xo‘jaligi mahsulotlari bo‘yicha “yashil yo‘laklar” tizimini yaratish;
* “Ekoinvest” uzoq muddatli dasturini yo‘lga qo‘yish;
* “Raqamli transport va bojxona idorasi”ni tashkil etish;
* Samarqandda “Milliy aviakompaniyalar forumi”ni o‘tkazish.
Ekologik xavflarga qarshi kurashish va logistika zanjirlarini barqarorlashtirish masalalari ham alohida e’tibor markazida bo‘ldi.
Muxtaram Prezidentimizning nutqi IXT doirasidagi amaliy hamkorlikni yanada chuqurlashtirishga yo‘naltirilgan, konstruktiv va aniq takliflarga boy bo‘ldi.