Amaliy seminar tashkil etildi

Xalq deputatlari Namangan shahar Kengashida deputatlik faoliyati samaradorligini oshirish, doimiy komissiyalar faoliyatini takomillashtirish hamda deputatlik nazoratini kuchaytirish masalalariga bag‘ishlangan amaliy seminar tashkil etildi.

Seminarda Namangan viloyati Kengashi kotibiyati mutaxassislari O.Orifbayev va Sh.Abdullayev ishtirok etib, deputatlar hamda Kengash kotibiyati xodimlariga amaliy-uslubiy tavsiyalar berdilar.

Tadbirda Namangan shahar Kengashi kotibiyati mudiri N.Ubaydullayev, kotibiyat bosh mutaxassislari A.Nurmatov va M.Abdulmajidov hamda kotibiyat xodimlari ishtirok etdilar.

Seminar davomida sessiya kun tartibiga kiritilgan masalalar yuzasidan deputatlarning sessiyadan avval saylov okruglarida o‘rganishlar olib borishi, aniqlangan muammo va takliflarni Kengash kotibiyatiga kiritib borishi hamda amalga oshirilgan ishlarni hujjatlar va fotofaktlar bilan asoslab borish masalalariga alohida e’tibor qaratildi.

Shuningdek, deputatlarning saylov okruglarida fuqarolar bilan ishlash amaliyoti, ko‘chama-ko‘cha yurish daftarlarini yuritish, doimiy komissiyalar tomonidan O‘zbekiston Respublikasining “Mahalliy davlat hokimiyati to‘g‘risida”gi Qonunining 19¹-moddasida belgilangan vakolatlar doirasida amalga oshirilayotgan ishlar, biriktirilgan qonunlar ijrosi yuzasidan olib borilayotgan o‘rganishlar hamda deputatlarning biriktirilgan tashkilotlar bilan hamkorlikdagi faoliyati muhokama qilindi.

Bundan tashqari, namunaviy doimiy komissiya qarorlari ijrosini ta’minlash, deputatlik nazoratini kuchaytirish, Kengash kotibiyati xodimlarining saylov okruglarida olib borayotgan amaliy faoliyatini tizimli tashkil etish hamda bajarilgan ishlarni aniq dalillar, hujjatlar va fotolavhalar asosida yoritish yuzasidan tegishli tavsiyalar berildi.

Seminar yakunida deputatlik nazoratini yanada kuchaytirish, doimiy komissiyalar faoliyati samaradorligini oshirish, qonunlar va Kengash qarorlari ijrosini joylarda muntazam o‘rganib borish hamda amalga oshirilayotgan ishlarni hujjatlar va fotofaktlar bilan tasdiqlash bo‘yicha ustuvor vazifalar belgilab olindi.

Mazkur seminar deputatlik faoliyatini yanada takomillashtirish, doimiy komissiyalar ish samaradorligini oshirish hamda Kengash faoliyatida ochiqlik va natijadorlikni ta’minlashga xizmat qiladi.