Xalq deputatlari Parkent tumani Kengashiga 24-“Tolbuloq” saylov okrugidan saylangan deputat Uboydullayeva Yulduz Abrorjonovna tomonidan saylovchilar bilan uchrashuvlar hamda “Tolbuloq” MFY nuroniylari va faollari bilan muloqotlarda ko‘tarilgan masalalar asosida Parkent tumani hokimi o‘rinbosari Sh. Akramovga deputat so‘rovi yuborildi.
Deputat so‘rovida O‘zbekiston Respublikasi Vazirlar Mahkamasining 2025-yil 1-avgustdagi 489-sonli qarorida “Tolbuloq” MFY hududi uchun belgilangan vazifalar ijrosiga alohida e’tibor qaratilgan.
🛣 Mazkur qarorga muvofiq, hududda 8 km yo‘lni asfaltlashtirish hamda 500 ta eskirgan simyog‘ochni yangisiga almashtirish ko‘zda tutilgan.
Shu munosabat bilan deputat tomonidan yuqoridagi vazifalar bo‘yicha:
·         qanday chora-tadbirlar rejalashtirilgani;
·         bugungi kunga qadar qanday amaliy ishlar amalga oshirilgani;
·         belgilangan ishlarning ijro holati;
·         mavjud muammo va kamchiliklar hamda ularni bartaraf etish bo‘yicha ko‘rilayotgan choralar
yuzasidan asoslantirilgan va batafsil ma’lumot taqdim etilishi so‘raldi.
Mazkur deputat so‘rovi “Tolbuloq” MFY aholisini qiynab kelayotgan yo‘l va elektr infratuzilmasi bilan bog‘liq masalalarning amaliy yechimini topish, qarorda belgilangan vazifalar ijrosini o‘rganish va bu boradagi ishlarni deputatlik nazorati doirasida kuzatib borish nuqtayi nazaridan muhim ahamiyatga ega.
Deputat Uboydullayeva Yulduz Abrorjonovna tomonidan yuborilgan deputat so‘rovi — saylovchilar murojaatlarini o‘rganish, hududdagi dolzarb masalalarni tegishli tashkilotlar oldiga qo‘yish va ularning ijrosini nazorat qilishga qaratilgan amaliy qadamdir.
⚠️ Deputatlik so‘rovi — aholi manfaatlarini ifoda etish va hududdagi muammolar yechimini izlashning muhim vositasidir.