Xalq deputatlari Qo‘qon shahar Kengashining “Mahalliy byudjet, tadbirkorlikni rivojlantirish va iqtisodiy islohotlar masalalari bo‘yicha” doimiy komissiyasining navbatdagi yig‘ilishi o‘tkazildi.

Yig‘ilish kun tartibidan Qo‘qon shahar mahalliy byudjetining qo‘shimcha manbalari hisobidan mablag‘larni yo‘naltirish masalasi o‘rin oldi. Mazkur masala yuzasidan tegishli tashkilotlarning ehtiyojlari, mavjud moliyaviy imkoniyatlar hamda mablag‘lardan maqsadli va samarali foydalanish masalalari muhokama qilindi.

Yig‘ilish davomida byudjet kodeksining tegishli moddalariga muvofiq, byudjetdan ajratiladigan mablag‘lar qisqartirilishi natijasida bo‘shab qolgan mablag‘larni yo‘naltirish bo‘yicha takliflar ko‘rib chiqildi. Umumiy hisobda 2 milliard 26 million so‘m mablag‘ni tegishli yo‘nalishlarga ajratish nazarda tutilgani qayd etildi.

Jumladan, shahar hokimligi hokim yordamchilarining yillik yakuniga qadar ish haqi va yagona ijtimoiy to‘lov xarajatlarining bir qismini moliyalashtirishga 250 million so‘m, shahar hokimligi xotin-qizlar yo‘nalishidagi xarajatlarni qoplashga 125 million so‘m, 1-sonli va 2-sonli sport maktablari uchun 250 million so‘mdan, 5-sonli bolalar musiqa va san’at maktabiga 375 million so‘m, 6-sonli hamda 7-sonli bolalar musiqa va san’at maktablariga 187 million 500 ming so‘mdan, shahar Maktabgacha va maktab ta’limi bo‘limiga 338 million 500 ming so‘m, shuningdek, shahar Axborot-kutubxona markaziga 62 million 500 ming so‘m mablag‘ ajratilishi ko‘zda tutilgan.

Doimiy komissiya a’zolari tomonidan mablag‘larni belgilangan maqsadlar asosida yo‘naltirish, ularning samarali va manzilli sarflanishini ta’minlash yuzasidan fikr va takliflar bildirildi.

Xalq deputatlari Qo‘qon shahar Kengashi