Қарақалпақстанның келешеги ҳаққында еки күн

Өзбекстан Республикасы Президенти Шавкат Мирзиёев 18-19-сентябрь күнлери расмий сапар менен Қарақалпақстанда болды. Қарақалпақстан ушын бундай сапарлар айрықша әҳмиетке ие. Бул тек ғана исленген жумысларды көриў емес, ал Қарақалпақстанның ертеңги келешеги қандай екени ҳаққында және бир мәрте сөйлесиў имканияты болып есапланады. 

Хызмет сапары даўамында Президентимиз мәҳәллелерде болып, санаат ҳәм социаллық жойбарларды көзден өткерди, жаңаланған "Туран" стадионы, билимлендириў, абаданластырыў ҳәм исбилерменлик объектлерин барып көрди. Жумыс орынларын жаратыў ҳәм халықтың дәраматларын арттырыў мәселелерине айрықша итибар қаратылды. 

Мен қалалық Кеңестиң депутаты сыпатында соны айтқым келеди-сапар даўамында айтылған ҳәм талықланған үлкен санлар ҳәм ири жойбарлардың
артында ең биринши нәўбетте инсан, яғный - мәҳәллемиздиң турғыны, жас қәниге, исбилермен, муғаллим, шыпакер ҳәм олардың турмысы, ертенги күнге ҳәм келешекке исеним менен қарайтуғын шаңарақ турыыпты. Сапар даўамында тек ғана экономикалық реформаларқа итибар қаратылмастан билимлендириў, спорт, қала инфраструктурасы, транспорт, санлы технологиялар, мәҳәллелерди раўажландырыў мәселелери додаланды. Бул болса аймақты раўажландырыўға комплексли қатнас жасаўдан дәрек береди. 

19-сентябрь күни өткерилген мәжилисте болса, Қарақалпақстанды социаллық-экономикалық жақтан және де раўажландырыў бойынша жаңа ўазыйпалар белгиленди. Санаат, аўыл хожалығы, энергетика, транспорт, социаллық тараўды раўажландырыў, жаңа жумыс орынларын жаратыў ҳәм халықтың абаданлығын арттырыў солардың қатарына киреди. 

Әсиресе, Қарақалпақстан турғынлары ушын 2027-жылдың март айынан баслап Ташкент ҳәм Нөкис арасында жолға кететуғын ўақытты 16 сааттан шама менен 7 саатқа шекем қысқартыў имканиятын беретуғын тезжүрер поездды иске түсириў режелери ҳаққындағы жаңалық пүткил халқымыз ушын айрықша әҳмийетке ийе болды.

Сентябрдиң бул еки күни тез өтти. Бирақ, олардың нәтийжелери қала ҳәм районларымызда, мәҳәллелеримизде ҳәм, ең әҳмиетлиси, ҳәр бир инсанның турмысында еле узақ ўақыт сезилип туратуғынлығы сөзсиз. 

Халық депутаталары Нөкис қалалық Кеңеси депутаты Зульфия Сейтниязова