OBI MAHALLASIDA ICHIMLIK SUVI TA’MINOTINI YAXSHILASH MASALASI DEPUTATLIK NAZORATIDA

🚨Aholining murojaatlarini o‘rganish va ularni qiynayotgan muammolarga amaliy yechim topish xalq deputatlari mahalliy Kengashlari deputatlari faoliyatining muhim yo‘nalishlaridan biridir.

🚨Xalq deputatlari Boysun tumani Kengashining 4-“Obi” saylov okrugidan saylangan deputat Sayyora Majidova tomonidan “Obi” mahallasi aholisining ichimlik suvi ta’minotini yaxshilash bilan bog‘liq murojaati o‘rganildi.

🚨Ma’lumki, “Obi” mahallasi hududida 2 ta davlat maktabgacha ta’lim tashkiloti, 1 ta xususiy maktabgacha ta’lim tashkiloti, Milliy gvardiya bo‘linmasi, Soliq inspeksiyasi, 1-sonli umumiy o‘rta ta’lim maktabi, aholiga xizmat ko‘rsatuvchi banklar hamda 50 dan ortiq savdo va maishiy xizmat ko‘rsatish obyektlari faoliyat yuritadi. Hududda aholi va ijtimoiy-iqtisodiy obyektlarning zich joylashgani muhandislik-kommunikatsiya infratuzilmasini, xususan, ichimlik suvi ta’minotini yanada yaxshilash zarurligini ko‘rsatmoqda.

🚨Shu munosabat bilan fuqarolarning murojaatlarini ijobiy hal etish maqsadida Boysun tumani hokimining birinchi o‘rinbosariga deputatlik so‘rovi kiritildi.

🚨Deputatlik so‘rovida “Obi” mahallasi hududida, jumladan, Olmazor ko‘chasida ichimlik suvi ta’minotini yaxshilash uchun uzunligi 1 kilometr, diametri 110 millimetr bo‘lgan ichimlik suvi quvurini ajratish va uni o‘rnatishda amaliy yordam ko‘rsatish so‘raldi.

🚨Aholini sifatli va barqaror ichimlik suvi bilan ta’minlash — ularning munosib hayot kechirishlari uchun muhim omil hisoblanadi. Shu bois, mazkur deputatlik so‘rovida ko‘tarilgan masalaning o‘z vaqtida hal etilishi “Obi” mahallasi aholisi, shuningdek, hududdagi ijtimoiy va xizmat ko‘rsatish obyektlari uchun ham muhim ahamiyat kasb etadi.

Aholi murojaatlariga e’tibor — muammolarga yechim, deputatlik nazorati esa amaliy natija demakdir.