Mahallalarda aholi bandligini ta’minlash, oilalar daromadini oshirish, tadbirkorlikni rivojlantirish hamda kambag‘allikni qisqartirish borasida amalga oshirilayotgan ishlarning samaradorligini joyiga chiqqan holda o‘rganish deputatlik nazoratining muhim yo‘nalishlaridan biridir.

O‘zbekiston Respublikasi Prezidentining PQ–406-son qarori, Oliy Majlis Senati Kengashining KQ–35-V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya asosida Xalq deputatlari Marg‘ilon shahar Kengashi deputati Z.G‘ofurova va Kengash kotibiyati bosh mutaxassisi Z.Yakubova tomonidan 19-Mustaqillik saylov okrugi hududidagi “Istiqlol” mahallasida hokim yordamchisining faoliyati joyiga chiqqan holda o‘rganildi.

O‘rganish davomida mahallada aholi bandligini ta’minlash, fuqarolarni tadbirkorlikka jalb etish, yangi daromad manbalarini yaratish hamda mavjud tadbirkorlik subyektlarini qo‘llab-quvvatlash borasida amalga oshirilayotgan ishlar bilan tanishildi.

Jumladan, mahallada tadbirkorlik faoliyatini yo‘lga qo‘ygan fuqarolarning faoliyati joyiga chiqib o‘rganildi. YATT Xoliqov Erkin Hamidulloyevich tomonidan milliy shirinliklar ishlab chiqarish yo‘lga qo‘yilgan bo‘lib, ushbu faoliyat oziq-ovqat sanoati yo‘nalishida mahalliy ishlab chiqarishni rivojlantirishga xizmat qilmoqda.

Shuningdek, YATT Tursunov Ahmad Kamilovich tomonidan savdo do‘koni tashkil etilib, aholiga savdo xizmatlari ko‘rsatilayotgani o‘rganildi.

Deputatlik o‘rganishi davomida mazkur tadbirkorlik subyektlarining faoliyati, yaratilgan sharoitlar, mavjud imkoniyatlar hamda kelgusida faoliyatni kengaytirish masalalariga e’tibor qaratildi.

O‘rganish yakunida mahallada tadbirkorlikni yanada rivojlantirish, aholi uchun yangi daromad manbalarini ko‘paytirish va bandlikni ta’minlash imkoniyatlaridan samarali foydalanish bo‘yicha tegishli takliflar bildirildi.