19-Istiqbol saylov okrugi deputati D. Hayitova hamda tuman Kengashi kotibiyati bosh mutaxassisi B. Panjiyev tomonidan mahallada ijtimoiy xodim faoliyati yuzasidan o‘rganish ishlari olib borildi.

O‘rganish davomida aholining ijtimoiy ehtiyojmand toifalariga ko‘rsatilayotgan xizmatlarni sifatli tashkil etish, fuqarolarning murojaatlari bilan ishlash tizimi hamda kam ta’minlangan oilalarni ijtimoiy qo‘llab-quvvatlash bo‘yicha amalga oshirilayotgan ishlar atroflicha ko‘rib chiqildi.

Xususan, kam ta’minlangan oilalarga ijtimoiy nafaqalar va bir martalik moddiy yordamlarni tayinlash jarayonlarining qonunchilik talablariga muvofiqligi, shaffofligi hamda fuqarolar uchun qulaylik yaratish darajasi tahlil qilindi. Shuningdek, ijtimoiy himoyaga muhtoj fuqarolarni aniqlash va ularga manzilli yordam ko‘rsatish bo‘yicha amalga oshirilayotgan chora-tadbirlar holati o‘rganildi.

O‘rganish jarayonida mavjud muammolar va kamchiliklar yuzasidan mas’ullarga tegishli tavsiyalar berilib, ijtimoiy xizmatlar sifatini yanada oshirish, fuqarolarga tezkor va samarali yordam ko‘rsatish bo‘yicha aniq vazifalar belgilab olindi.

Mazkur o‘rganishlar mahallalarda ijtimoiy himoya tizimini yanada takomillashtirish, aholining ijtimoiy barqarorligini ta’minlash hamda ehtiyojmand oilalarni davlat tomonidan qo‘llab-quvvatlash samaradorligini oshirishga xizmat qiladi.