Xalq deputatlari Qo‘qon shahar Kengashi deputati M.Usmonov saylangan saylov okrugi tarkibidagi “Tolzor” mahalla fuqarolar yig‘inida hokim yordamchisi faoliyatini o‘rganish ishlari davom ettirildi.

O‘rganish jarayonida Xalq deputatlari Qo‘qon shahar Kengashi kotibiyati mudiri A.Nosirov tomonidan hokim yordamchisining aholi bandligini ta’minlash va tadbirkorlikni rivojlantirish borasidagi ishlari tahlil qilindi.

Jumladan, Bandi Eshon ko‘chasi, 80-uyda istiqomat qiluvchi fuqaro O.Jo‘rayevga o‘z biznesini yo‘lga qo‘yishi uchun 40 million so‘m miqdorida kredit mablag‘i ajratilganligi hamda ushbu mablag‘lar hisobidan fuqaroning nonvoyxona faoliyatini tashkil etganligi joyiga chiqib o‘rganildi.

O‘rganish davomida nonvoyxonada yaratilgan sharoitlar, ishlab chiqarish jarayoni va faoliyatning bugungi holati bilan yaqindan tanishildi.

Ta’kidlanganidek, bunday loyihalar aholi bandligini ta’minlash, oilalar daromadini oshirish hamda mahallalarda tadbirkorlik muhitini rivojlantirishda muhim ahamiyat kasb etmoqda.

Suhbat davomida tadbirkor tomonidan amalga oshirilayotgan ishlar, kelgusidagi rejalari hamda faoliyatni yanada kengaytirish masalalari yuzasidan fikr almashildi.

O‘rganish yakunida ajratilgan kredit mablag‘larining maqsadli sarflanishi va yaratilgan tadbirkorlik faoliyatining samaradorligi ijobiy baholanib, bu kabi tashabbuslarni qo‘llab-quvvatlash ishlari davom ettirilishi ta’kidlandi.

Xalq deputatlari Qo‘qon shahar Kengashi