Xalq deputatlari Marg‘ilon shahar Kengashi deputati M.Abdurahmonova shahar obodonlashtirish boshqarmasi yo‘llardan foydalanish bo‘limi boshlig‘i D.Qodirov hamrohligida Do‘stlik mahalla fuqarolar yig‘inida joylashgan tranzit ariq ustiga qurilgan ko‘prikning texnik holatini o‘rgandilar.

O‘rganish jarayonida mazkur ko‘prikning foydalanish davomida nosoz holatga kelib qolgani, bu esa hudud aholisining harakatlanishi va xavfsizligiga ma’lum darajada noqulayliklar tug‘dirayotgani qayd etildi. Mutasaddilar tomonidan inshootning bugungi holati joyiga chiqqan holda ko‘zdan kechirilib, mavjud muammolar hamda ularni bartaraf etish yuzasidan zarur takliflar muhokama qilindi.

Shuningdek, ko‘prikni ta’mirlash va uning xavfsiz ekspluatatsiyasini ta’minlash bo‘yicha tegishli chora-tadbirlarni amalga oshirish masalalari yuzasidan mas’ul tashkilotlarga tavsiyalar berildi.

Xalq deputatlari Marg‘ilon shahar Kengashi deputatlari tomonidan hududlarda fuqarolarni qiynayotgan muammolarni o‘rganish, ularning yechimi bo‘yicha amaliy choralar ko‘rish hamda aholi murojaatlariga tezkor munosabat bildirish ishlari davom ettirilmoqda.