🔷Xalq deputatlari Bo‘stonliq tumani Kengashining 2026-yilga mo‘ljallangan ish rejasiga muvofiq O‘zbekiston Respublikasi Prezidentining 2025-yil 27-dekabrdagi “2026 – 2028-yillarda O‘zbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari to‘g‘risida”gi PQ-393-sonli qaroriga asosan respublika ahamiyatiga ega bo‘lgan D006 va D014 avtomobil yo‘llarini G‘azalkent shahri yaqinida bir-biriga bog‘lash bo‘yicha olib borilayotgan ishlar O‘zbekiston Liberal demokratik partiyasidan saylangan deputat A.Kulbayev tomonidan kotibiyat xodimi M.Tursunbayeva ishtirokida o‘rganildi.

🔷O‘rganish jarayonida mas’ul tashkilot vakillari hamda pudratchilar bilan muloqot qilinib, qurilish ishlarining bugungi holati, bajarilayotgan texnik jarayonlar, belgilangan muddatlar hamda sifat masalalari yuzasidan fikr almashildi.

🔷Ta’kidlanganidek, mazkur yo‘llar tutashuvi hududda transport oqimini tartibga solish, harakatlanish uchun qulaylik yaratish, shuningdek, G‘azalkent shahri va Bo‘stonliq tumanining boshqa hududlari o‘rtasidagi transport aloqalarini yanada yaxshilashda muhim ahamiyat kasb etadi.

🔷O‘rganish davomida deputat tomonidan qurilish ishlarini belgilangan grafik asosida va sifat talablariga to‘liq rioya qilgan holda olib borish, aholi va haydovchilar uchun xavfsizlik choralarini kuchaytirish, yo‘l atrofini obodonlashtirish ishlariga ham alohida e’tibor qaratish yuzasidan mas’ullarga tegishli tavsiya va takliflar bildirildi.

🔷Shuningdek, loyihaning o‘z vaqtida va sifatli yakunlanishi hududda iqtisodiy faollikni oshirish, turizm salohiyatini rivojlantirish hamda aholiga yanada qulay transport infratuzilmasini yaratishga xizmat qilishi qayd etildi.