1-sonli Ayniy saylov okrugi deputati, Romitan tumani hokimi U. Barnoyev tashabbusi bilan “Guliston” mahalla fuqarolar yig‘inida navbatdagi ochiq va samimiy uchrashuv tashkil etildi. Unda mahalla yettiligi a’zolari hamda keng jamoatchilik vakillari faol ishtirok etdi.

Uchrashuv davomida fuqarolarni qiynab kelayotgan dolzarb masalalar, hududni ijtimoiy-iqtisodiy rivojlantirish, infratuzilmani yaxshilash, aholi bandligini ta’minlash kabi muhim yo‘nalishlar yuzasidan ochiq muloqot olib borildi. Saylovchilar o‘z taklif va murojaatlarini bevosita bildirish imkoniga ega bo‘lib, ularning har biri atroflicha muhokama qilindi.

Shuningdek, uchrashuv jarayonida mahallada amalga oshirilayotgan ishlar, kelgusidagi ustuvor vazifalar hamda rejalashtirilgan loyihalar yuzasidan batafsil ma’lumotlar berildi. Bildirilgan taklif va muammolarni hal etish bo‘yicha mas’ullarga tegishli topshiriqlar berilib, ijrosi nazoratga olindi.

Mazkur uchrashuv aholi bilan ochiq muloqotni kuchaytirish, fuqarolarning davlat boshqaruvidagi ishtirokini yanada faollashtirish hamda hudud rivojiga xizmat qiluvchi muhim platforma bo‘lib xizmat qildi.