DEPUTAT SO‘ROVI IJOBIY YECHIM TOPDI

Xalq deputatlari Uychi tumani Kengashi deputati tomonidan Yorkatay mahallasi A.Temur ko‘chasida istiqomat qiluvchi fuqarolarning murojaati o‘rganilib, aholini sog‘lom turmush tarziga jalb etish, yoshlarning bo‘sh vaqtlarini mazmunli tashkil etish hamda sport bilan shug‘ullanishlari uchun qulay shart-sharoit yaratish masalasi yuzasidan deputatlik so‘rovi yuborilgan edi.

Murojaatda A.Temur ko‘chasidagi mavjud ochiq maydonchadan samarali foydalanish, ushbu hududda zamonaviy sport maydonchasi tashkil etish hamda yoshlar uchun zarur shart-sharoitlarni yaratishda amaliy va moddiy yordam ko‘rsatish so‘ralgan.

Mazkur deputatlik so‘rovi tegishli tashkilotlar tomonidan o‘rganilib, fuqarolarning murojaatida ko‘tarilgan masala ijobiy hal etildi.

Natijada Yorkatay mahallasi A.Temur ko‘chasida istiqomat qiluvchi aholi, ayniqsa, yoshlarning sport bilan muntazam shug‘ullanishi, bo‘sh vaqtlarini mazmunli o‘tkazishi va sog‘lom turmush tarzini shakllantirishlari uchun zarur shart-sharoit yaratishga qaratilgan amaliy ishlar amalga oshirildi.

Fuqarolar tomonidan bildirilgan taklif va murojaatlarning deputatlik so‘rovlari orqali o‘rganilib, ularning amaliy yechim topayotgani aholining muammolarini joyida hal etishda deputatlik faoliyatining muhim ahamiyatga ega ekanini ko‘rsatmoqda.