Guliston shahrida so‘nggi yillarda jamoat transporti tizimini rivojlantirish borasida sezilarli ishlar amalga oshirildi. Xususan, 2025-yilda shahar jamoat transporti tizimi tubdan yangilanib, yo‘nalishlarga jami 72 ta zamonaviy, ekologik toza avtobus olib kelinib foydalanishga topshirildi. Mazkur yangilanish aholiga qulay, xavfsiz va zamonaviy transport xizmatini tashkil etishda muhim qadam bo‘ldi.

Bugungi kunda shaharda 7 ta yo‘nalish bo‘yicha avtobuslar qatnovi yo‘lga qo‘yilgan bo‘lib, ular orqali 23 ta mahalla qamrab olingan. Kunlik yo‘lovchilar oqimi o‘rtacha 25–30 ming nafar atrofida bo‘lib, bu jamoat transportiga bo‘lgan talab yuqori ekanini ko‘rsatadi.

Shu bilan birga, olib borilgan o‘rganishlar tizimda hali ham yechimini kutayotgan ayrim muammolar mavjudligini ko‘rsatmoqda. Avvalo, avtobuslar harakat jadvalining aniq va shaffof tarzda e’lon qilinmagani aholiga noqulaylik tug‘dirmoqda. Amaliyotda avtobuslar harakati mavjud bo‘lsa-da, ularning kelish va ketish vaqtlari bo‘yicha aniq ma’lumot yetishmasligi fuqarolar uchun qiyinchiliklar keltirib chiqarmoqda.

Yana bir dolzarb masala — bekatlar holati bilan bog‘liq. Ayrim hududlardagi bekatlarda zarur infratuzilma, jumladan soyabonlar, o‘rindiqlar va yoritish tizimlari yetarli darajada emas. Bu esa ayniqsa yozning issiq kunlari va qishning sovuq mavsumida, shuningdek kechki paytlarda aholiga noqulaylik tug‘diradi.

Transport qamrovi borasida ham ayrim kamchiliklar kuzatilmoqda. Asosiy mahallalar qamrab olingan bo‘lsa-da, chekka hududlarda avtobuslar qatnovi intervalining uzoqligi yoki ayrim ichki ko‘chalarga yetib bormasligi fuqarolarning haqli e’tirozlariga sabab bo‘lmoqda.

Shu bilan birga, jamoat transportida yaratilgan qulayliklarni alohida e’tirof etish lozim. Yangi avtobuslar zamonaviy talablar asosida jihozlangan bo‘lib, imkoniyati cheklangan fuqarolar uchun qulay sharoitlar yaratilgan, ayrim yo‘nalishlarda elektron to‘lov tizimlari joriy etilgan.

Mutaxassislar fikricha, mavjud muammolarni bartaraf etish uchun avtobuslar harakat jadvalini tizimlashtirish va uni aholiga ochiq e’lon qilish, bekatlarni zamonaviy talablar asosida jihozlash, shuningdek transport qamrovini yanada kengaytirish bo‘yicha aniq choralar ko‘rish zarur.

Xulosa qilib aytganda, Guliston shahrida jamoat transporti tizimi 2025-yilda amalga oshirilgan keng ko‘lamli yangilanishlar natijasida yangi bosqichga ko‘tarildi. Endilikda esa ushbu tizimning samaradorligini oshirish, aholiga sifatli va uzluksiz xizmat ko‘rsatishni ta’minlash ustuvor vazifa bo‘lib qolmoqda.

Xalq deputatlari Guliston shahar Kengashi deputati - Sirojiddin Muxammadiyev