Usı jılı 3-dekabr - Mayıplıǵı bolǵan shaxslar kúni múnásibeti menen Nókis qalasında bolıp ótken ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, sońǵı jılları elimizde mámleketimiz basshısı tárepinen "Insan qádiri ushın," "Hesh bir insan mehir hám itibardan shette qalmawı kerek" degen iygilikli reformalar tiykarında keń kólemli reformalar ámelge asırılıp, imkaniyatı sheklengen shaxslardı qollap-quwatlaw, olardıń nızamlı máplerin qorǵaw, medicinalıq, sociallıq járdem kórsetiw, turmıs dárejesin jaqsılaw, zárúr bilim hám kónlikpelerge ie bolıwı, denetárbiya hám sport penen shuǵıllanıwı ushın barlıq sharayatlar jaratılıp atır, - dep atap ótken edi. Álbette, bunday ilajlardı ámelge asırıwda baqshalar, mektep internatlar hám Miriwbet úyleri áhmietli orın tutpaqta. Eń áhmietlisi, mayıplıǵı bolǵan shaxslardı qollap-quwatlaw boyınsha qabıl etilip atırǵan párman hám qararlar bul baǵdardaǵı ilajlardı jáne de joqarı basqıshlarǵa kótermekte. 

- Usı jıldıń basınan berli 7706 puqaraǵa 10 mlrd. sumlıq protez ortopediya hám reabilitaciya texnikalıq buyımları berildi. 1300 den aslam puqaranıń salamatlıǵı tiklendi, 3 mıńnan aslam puqaraǵa sanitariyalıq jollanbalar, jumısqa alǵan 1033 kárxanaǵa bolsa 9 milliard 525 million sumlıq jeńillikler berilgen. 13,5 km uzınlıqtaǵı jollar mayıplıǵı bar adamlar ushın beyimlestirilmekte. Búgingi kúnde 25 sport orayında 600 den aslam para sporchılar turaqlı túrde shuǵıllanıp kelmekte, - dep atap ótken edi.

Álbette, bul ámeliy jumıslardıń barlıǵı jámiette mayıplıǵı bolǵan shaxslardıń huqıq hám máplerin qorǵaw, sociallıq jaqtan qollap-quwatlaw baǵdarındaǵı mámleket dárejesindegi itibar hám reformalardıń tiykarın quramaqta.

Xalqımız miyrim shápáátke tolı xalıq. Biraq, kewilsiz, ózgelerdiń járdemine mútáj mayıplıǵı bolǵan shaxslardı sociallıq hám ruwxıy qollap-quwatlaw, ámeliy járdemler kórsetiw, eń baslısı jámiettiń teń huqıqlı aǵzası sıpatında imkaniyat jaratıwda itibarımızdı jedel arttırıwımız zárúr dep oylayman. Sonıń ushın miyrim-shápáátti tómennen baslaw kerek hám mekteplerde tek ǵana mayıplar kúni úy tárbiyasındaǵı oqıwshılardan xabar almay, olar menen háptesine bir márte bolsa da itibar qaratıp, jeke sáwbetlesiw, teńlesleri arasında doslıq baylanıstı kúsheytiw, oqıwshılar arasında mayıplıǵı bar bolǵan teńlesin kóriw arqalı insanıylıq pazıyletlerin rawajlandırıw, bir-birine húrmet, adamgershilik sezimlerin oyatıw mayıplıǵı bolǵan puqaralar arasında óz óneri, kásibi menen tanılǵan yamasa sportta jetiskenlikke erisken paraolimpiada jeńimpazları menen birgelikte dógerek sáwbetler ótkeriw arqalı jaslarımızda jańa sezimlerdi payda ete alsaq, óz wazıypalarımızdı orınlaǵan bolar edik.

Gulistan Yusupova,

Xalıq deputatları Qaraózek rayonlıq Keńesi deputatı, ÓzXDP deputatlıq toparı aǵzası