Murojaat yuzasidan o‘rganish ishlari olib borildi

Xalq deputatlari Navoiy shahar Kengashi deputati Faizieva Feruza Mardonovna xizmat safarida bo‘lganligi sababli, fuqarolar tomonidan kelib tushgan murojaat Xalq deputatlari Navoiy shahar Kengashi kotibiyati bosh mutaxassisi M. Astanova tomonidan joyiga chiqib o‘rganildi.

Murojaatda Navoiy shahar M. Tarobiy ko‘chasi 46-B-uy hamda ZGG uylarida yashovchi fuqarolar tomonidan ko‘p qavatli uylarga xizmat ko‘rsatuvchi boshqaruv kompaniyasi — “Humo Zilola Plyus” MChJ faoliyatidan norozilik bildirilgan. Xususan, kirish eshiklaridagi domofon tizimlari to‘liq ishlamasligi, “jiton”lar (kirish kalitlari) to‘liq taqsimlanmagani, tashqi kuzatuv kameralarining ishlamasligi, shuningdek, kirish yo‘laklaridagi videokuzatuv tizimlari nosoz holatda ekani qayd etildi.

Fuqarolar tomonidan ta’kidlanishicha, natijada ko‘p qavatli uylar kirish qismlarida xavfsizlik darajasi pasaygan, kirib-chiqayotgan shaxslarni nazorat qilish imkoniyati mavjud emasligi aholida asosli e’tirozlar uyg‘otmoqda.

Mazkur masala deputatlik nazoratiga olinib, fuqarolar murojaatida ko‘tarilgan muammolarni bartaraf etish bo‘yicha amaliy choralar ko‘rilishi belgilandi.