Xalq deputatlari Nurobod tumani Kengashi kotibiyati mudiri B.Oblanov tomonidan 16-Sazag‘on saylov okrugida joylashgan, “ACWA Power” kompaniyasiga tegishli “Sazag‘on” quyosh fotoelektr stansiyasi qurilish maydonida o‘rganish ishlari olib borildi.

➡️Qurilish maydoniga tashrif davomida loyiha doirasida amalga oshirilayotgan bunyodkorlik ishlari, qurilishning bugungi holati, ishlarning borishi hamda belgilangan reja-grafik asosida bajarilayotgan tadbirlar bilan yaqindan tanishildi.
Shuningdek, stansiya qurilishida zamonaviy texnologiyalarni joriy etish, muhandislik-kommunikatsiya tarmoqlarini barpo etish, qurilish jarayonlariga mahalliy mutaxassislarni jalb qilish va yangi ish o‘rinlarini yaratish masalalari yuzasidan mas’ullar bilan muloqot o‘tkazildi.

➡️Tashrif davomida xorijiy kompaniya vakillari tomonidan loyiha ijrosini jadallashtirish, zarur infratuzilma bilan ta’minlash, ayrim tashkiliy masalalarni hal etish hamda qurilish jarayonida yuzaga kelayotgan muammolar bo‘yicha o‘z taklif va murojaatlari bildirildi.

➡️Mazkur taklif va muammolar yuzasidan tegishli tashkilotlar bilan hamkorlikda muhokamalar o‘tkazilib, ularni bartaraf etish, loyiha ishlarini o‘z vaqtida va sifatli amalga oshirish maqsadida zarur choralar belgilab olindi hamda mas’ullarga tegishli topshiriqlar berildi.

➡️Ta’kidlanganidek, “Sazag‘on” quyosh fotoelektr stansiyasi loyihasi nafaqat tumanning energetika salohiyatini oshirish, balki qayta tiklanuvchi energiya manbalaridan samarali foydalanish, hududga investitsiyalarni jalb etish, yangi ish o‘rinlari yaratish va aholi farovonligini yuksaltirishda muhim ahamiyat kasb etadi.

➡️Xalq deputatlari Nurobod tumani Kengashi tomonidan hududda amalga oshirilayotgan yirik investitsiya loyihalari, xususan, energetika sohasidagi bunyodkorlik ishlari ustidan deputatlik nazoratini amalga oshirish, investorlar faoliyatini qo‘llab-quvvatlash hamda mavjud muammolarni o‘z vaqtida bartaraf etish borasidagi ishlar izchil davom ettirilmoqda.