Xalq deputatlari Taxiatosh tumani Kengashi raisi, Oʻzbekiston Liberal-demokratik partiyasidan saylangan deputat Xidirbayev Rashid Xidirbayevich Kengash kotibiyati bosh mutaxassisi D.Xodjanov hamda “Ekspert guruhi” a’zosi M.Mamutov bilan birgalikda “Keksalar, nogironligi bo‘lgan shaxslar va aholining boshqa ijtimoiy ehtiyojmand toifalari uchun ijtimoiy xizmatlar to‘g‘risida”gi O‘zbekiston Respublikasi Qonuni (O‘RQ–641, 2020-yil 15-oktyabr) ijrosi yuzasidan nazorat tadbirlarini davom ettirdi.

Navbatdagi manzil — O‘zbekiston Respublikasi Prezidenti huzuridagi Ijtimoiy himoya milliy agentligining “Keksalar va nogironligi bo‘lgan shaxslar, urush va mehnat faxriylari uchun Taxiatosh sanatoriysi” bo‘ldi.

O‘rganish davomida muassasada keksalar va nogironligi bo‘lgan shaxslar uchun yaratilgan shart-sharoitlar, ko‘rsatilayotgan ijtimoiy va tibbiy xizmatlar sifati, bino va infratuzilmaning nogironligi bo‘lgan shaxslar ehtiyojlariga moslashtirilganligi hamda amaldagi talablarga muvofiqligi atroflicha ko‘zdan kechirildi.

Shuningdek, mas’ul xodimlar bilan xizmat ko‘rsatish sifatini yanada oshirish, ehtiyojmand fuqarolar uchun qulay va xavfsiz muhitni ta’minlash yuzasidan fikr almashilib, tegishli tavsiyalar bildirildi.

Aholining ijtimoiy himoyaga muhtoj qatlamlari uchun yaratilayotgan sharoitlarni muntazam o‘rganish va nazorat qilish — qonunlar ijrosini ta’minlash hamda xizmatlar sifatini oshirishning muhim omilidir.