15-Naqqoshlik saylov okrugi deputati Nazirov Madaminjon Ma’rufjon o‘g‘li tomonidan O‘zbekiston Respublikasining “Ko‘p kvartirali uylarni boshqarish to‘g‘risida”gi Qonuni (O‘RQ–581) talablarining hududda ijro etilishi holati o‘rganildi.

O‘rganish jarayonida boshqaruv kompaniyalari faoliyatining samaradorligi, ko‘p qavatli uylarning ichki yo‘laklari holati, shuningdek, umumiy mol-mulkni saqlash va undan foydalanish bo‘yicha belgilangan talablarning bajarilishi yuzasidan monitoring olib borildi.

Qonunga muvofiq, umumiy mol-mulkni saqlash uning lozim darajadagi texnik va sanitariya holatini ta’minlashga qaratilgan bo‘lib, mazkur faoliyat umumiy mol-mulkning texnik hamda sanitariya holatini saqlab turish, unga xizmat ko‘rsatish, ta’mirlash, shuningdek, ushbu mol-mulkni asrash va undan foydalanish uchun zarur shart-sharoitlarni yaratishga qaratilgan boshqa tadbirlarni ham o‘z ichiga oladi.

Shuningdek, ko‘p kvartirali uyni boshqarish organi amaldagi majburiy normalarga muvofiq, umumiy mol-mulkni saqlash bo‘yicha bajarilmasligi ko‘p kvartirali uyga, fuqarolarning hayoti va sog‘lig‘iga, shaxslarning mol-mulkiga hamda atrof-muhitga bevosita xavf tug‘dirishi mumkin bo‘lgan majburiy tadbirlar va ishlarni amalga oshirishi shartligi alohida ta’kidlandi.

Mazkur majburiy normalar yong‘in xavfsizligi, sanitariya, shaharsozlik normalari hamda ko‘p kvartirali uylarga xizmat ko‘rsatish bilan bog‘liq tadbirlarni o‘z ichiga oladi.

O‘rganish yakunlari bo‘yicha aniqlangan holatlar yuzasidan qonunchilik talablarining to‘liq va sifatli ijrosini ta’minlash, boshqaruv kompaniyalari faoliyati samaradorligini yanada oshirish hamda ko‘p kvartirali uylarning umumiy mol-mulkini belgilangan tartibda saqlash bo‘yicha tegishli tavsiya va takliflar bildirildi.