Xalq deputatlari Qo‘qon shahar Kengashining “Mahalliy budjet, tadbirkorlikni rivojlantirish va iqtisodiy islohotlar masalalari bo‘yicha” doimiy komissiyasi a’zolari — deputatlar O‘.Maxmudov, X.Abdullayev, Qo‘qon shahar Iqtisodiyot va moliya bo‘limi mutaxassisi E.Madaminov hamda hokim yordamchisi N.Komiljonov tomonidan shahar Kengashining navbatdagi sessiyasi kun tartibiga kiritilgan masala yuzasidan o‘rganish ishlari olib borildi.

O‘rganish davomida “Olmazor tajribasi” asosida Qo‘qon shahrini ijtimoiy-iqtisodiy rivojlantirishga qaratilgan kompleks chora-tadbirlar rejasining ijrosi tahlil qilinib, sohil va kanal bo‘ylarini rivojlantirish yo‘nalishi bo‘yicha amalga oshirilishi rejalashtirilgan loyihalar joyiga chiqqan holda ko‘rib chiqildi.

Xususan, “Qo‘qonsoy” bo‘yi hududlarini zamonaviy landshaft dizayni asosida modernizatsiya qilish, ularning jozibadorligini oshirish hamda xizmat ko‘rsatish sohasini rivojlantirish imkoniyatlari o‘rganildi.

Loyiha doirasida kanal bo‘ylab piyodalar va velosiped yo‘laklarini tashkil etish, zamonaviy “Yashil yo‘lak”lar barpo etish, tungi yoritish tizimlarini o‘rnatish hamda aholining mazmunli hordiq chiqarishi uchun qulay maskanlar yaratish rejalashtirilgan.

Shuningdek, ushbu hududlarda xizmat ko‘rsatish sohasini rivojlantirish orqali yangi ish o‘rinlari yaratish, tadbirkorlik faoliyatini qo‘llab-quvvatlash va shahar infratuzilmasini yanada takomillashtirish masalalariga alohida e’tibor qaratildi.

O‘rganish yakunida mas’ullarga loyihalarni sifatli amalga oshirish, hududlarning ekologik holatini yaxshilash hamda fuqarolar uchun zamonaviy va qulay dam olish maskanlarini yaratish yuzasidan tegishli tavsiyalar berildi.

Xalq deputatlari Qo‘qon shahar Kengashi