10-SONLI DMTT BINOSIDAGI KAMCHILIKLAR O‘RGANILDI

Xalq deputatlari Oqoltin tuman Kengashi raisi Sh.Eshbayev hamda Kengash kotibiyati mudiri N.Turdiyev tomonidan O‘zbekiston Respublikasi Prezidentining PQ-93-sonli qarori asosida Ko‘rkam diyor mahallasida ta’mirlangan 10-sonli davlat maktabgacha ta’lim tashkiloti (DMTT) binosida amalga oshirilgan ishlar holati o‘rganildi.

O‘rganish davomida ta’mirlash ishlari to‘liq yakunlanmaganligi va ayrim kamchiliklar mavjudligi aniqlandi. Jumladan, binoning tom qismiga o‘rnatilgan shiferlarning ayrimlari singanligi sababli yoriqlardan yomg‘ir suvlari sizib kirmoqda. Shuningdek, qorovulxona elektr ta’minotiga ulanmagan hamda kanalizatsiya tizimini o‘rnatish ishlari yakuniga yetkazilmagan.

Aniqlangan kamchiliklarni bartaraf etish, ta’mirlash ishlarini sifatli va to‘liq yakunlash hamda maktabgacha ta’lim tashkilotida bolalar uchun xavfsiz va qulay sharoit yaratish zarurligi ta’kidlandi.