Mahalla boshqaruvi samaradorligi, aholi muammolarining yechimi va “mahalla yettiligi” faoliyati — nazorat markazida.

Xalq deputatlari Termiz shahar Kengashining 14-“Bog‘zor” saylov okrugi deputati O.Sharofutdinova tomonidan “Gulira’no” mahallasida mahalla raisi T.Allayorovaning faoliyati yuzasidan nazorat-tahlil tadbiri o‘tkazildi.

O‘rganish O‘zbekiston Respublikasi Prezidentining 2026-yil 24-iyundagi PF–116-son Farmonida belgilangan vazifalar ijrosi doirasida tashkil etildi.
Asosiy e’tibor nimalarga qaratildi?

Nazorat-tahlil davomida mahalla raisining “mahalla yettiligi” faoliyatini muvofiqlashtirish, aholi muammolarini xonadonbay o‘rganish, fuqarolar murojaatlarini ko‘rib chiqish va ularning yechimini ta’minlash borasidagi ishlari tahlil qilindi.

Shuningdek, kambag‘allik va ishsizlikni qisqartirish, jinoyatchilikning oldini olish, oilaviy nizolarni kamaytirish, ijtimoiy himoyaga muhtoj fuqarolarni qo‘llab-quvvatlash hamda mahallada sog‘lom ijtimoiy muhitni shakllantirish masalalariga e’tibor qaratildi.

🏘 Obodonlashtirish va infratuzilma masalalari ham chetda qolmadi.

Mahallada tozalik va obodonlashtirish ishlarini tashkil etish, hududni ko‘kalamzorlashtirish, “Yashil makon” loyihasi doirasidagi vazifalar ijrosi, shuningdek, ichki yo‘llar, elektr energiyasi, ichimlik suvi va tabiiy gaz ta’minoti bilan bog‘liq muammolar yuzasidan murojaatlar o‘rganildi.

Fuqarolar bilan muloqotlarda aniqlangan masalalarni tegishli tashkilotlar bilan hamkorlikda hal etish, davlat organlari faoliyati ustidan jamoatchilik nazoratini kuchaytirish va aholi oldida hisobdorlikni ta’minlash muhimligi ta’kidlandi.

📌 O‘rganish yakunida mahalla raisiga PF–116-son Farmonida belgilangan vazifalarni tizimli tashkil etish, “mahalla yettiligi” a’zolari hamkorligini kuchaytirish, aholi muammolariga manzilli yondashish va ularning amaliy yechimini ta’minlash yuzasidan tegishli tavsiyalar berildi.

Aniqlangan holatlar va bildirilgan takliflar umumlashtirilib, tegishli doimiy komissiyada dastlabki tartibda ko‘rib chiqish hamda Xalq deputatlari Termiz shahar Kengashining navbatdagi sessiyasi kun tartibiga kiritish uchun taqdim etiladi.

Deputatlik nazoratining asosiy mezoni — mahalladagi mavjud muammolarni aniqlash, mas’ullar faoliyatini tahlil qilish va aholi manfaatlariga xizmat qiladigan amaliy yechimlarga erishishdir.