O‘zbekiston Respublikasi va Rossiya Federatsiyasi hududlari Kengashining III yig‘ilishi hamda iqtisodiy hamkorlik bo‘yicha hukumatlararo komissiyaning 27-yig‘ilishi doirasida Rossiya Federatsiyasi Hukumati Raisining birinchi o‘rinbosari Denis Manturov boshchiligidagi delegatsiyaning Marg‘ilon shahriga tashrifi shahrimiz hayotidagi muhim voqealardan biri bo‘ldi.

Nufuzli xalqaro tadbir doirasida xorijiy delegatsiyaning Marg‘ilonda bo‘lishi qadimiy va betakror shahrimizga bo‘lgan e’tibor, uning iqtisodiy, madaniy va turistik salohiyatiga berilayotgan yuksak bahoning amaliy ifodasidir.

Marg‘ilon tarixan hunarmandchilik,yengil sanoat va toʻqimachilik, savdo-sotiq, ilm-ma’rifat rivojlangan shaharlardan biri sifatida tanilgan. Bugungi kunda esa bu salohiyat xalqaro hamkorlikning yangi imkoniyatlari bilan uyg‘unlashib bormoqda. Ayniqsa, Rossiya hududlari bilan turizm, hunarmandchilik, tadbirkorlik, madaniyat va boshqa yo‘nalishlarda hamkorlikni kengaytirish Marg‘ilon uchun yangi istiqbollarni yuzaga chiqaradi.

Denis Manturov boshchiligidagi delegatsiyaning Marg‘ilonga tashrifi shahrimizning xalqaro aloqalardagi o‘rni tobora mustahkamlanayotganini ko‘rsatdi. Bu esa biz, mahalliy Kengash deputatlari zimmasiga mavjud imkoniyatlardan samarali foydalanish, yangi tashabbuslarni qo‘llab-quvvatlash va ularning natijadorligini xalq manfaatlari nuqtayi nazaridan nazorat qilishdek muhim vazifalarni yuklaydi.