2-sentyabr kuni Muzrabot tumanidagi umumiy o‘rta ta’lim maktablarida 2026–2027-o‘quv yilining boshlanishiga bag‘ishlangan “Birinchi qo‘ng‘iroq” va “Bilimlar kuni” tadbirlari bayramona kayfiyatda o‘tkazildi.

Yangi o‘quv yilining ilk kunida Xalq deputatlari Muzrabot tumani Kengashi kotibiyati mudiri Sherboyev Dilmurod tumandagi 48-sonli umumiy o‘rta ta’lim maktabida bo‘lib, tadbirda ishtirok etdi.

Tadbirda o‘quvchilar uchun yangi o‘quv yilining boshlanishi, ayniqsa, birinchi sinfga qadam qo‘ygan bolajonlar hayotidagi unutilmas voqea ekani ta’kidlandi. Ustoz va murabbiylarning yosh avlodga puxta bilim berish, ularni vatanparvarlik, insonparvarlik va ezgu fazilatlar ruhida tarbiyalashdagi mas’uliyati haqida so‘z yuritildi.

Bugungi kunda ta’limga qaratilayotgan e’tibor va yaratilayotgan imkoniyatlardan samarali foydalanish, o‘quvchilarning bilim olishga bo‘lgan qiziqishini qo‘llab-quvvatlash muhim vazifalardan biri ekani qayd etildi. Bu borada maktab, ota-ona va mahalla hamkorligini yanada mustahkamlash zarurligi alohida ta’kidlandi.

“Bilimlar kuni” tadbirining hayajonli va quvonchli lahzalarida maktabning 1-sinf o‘quvchilariga Prezident sovg‘alari tantanali ravishda topshirildi.

Yangi o‘quv yilining ilk qo‘ng‘irog‘i maktablarda nafaqat yangi darslar, balki yangi orzu va maqsadlar sari chorlov bo‘ldi.