#deputatlar_nazorati #poytaxtdeputatlari #deputatlik_faoliyati #Sessiya_oldi_organish

❗️ OILA VA XOTIN-QIZLAR MASALALARI BO‘YICHA AMALGA OSHIRILAYOTGAN ISHLAR DEPUTATLAR TOMONIDAN O‘RGANILMOQDA

🏛 Xalq deputatlari Toshkent shahar Kengashining Yoshlar siyosati, madaniyat va sport masalalari bo‘yicha doimiy komissiyasi a’zolari tomonidan Oila va xotin-qizlar masalalari bo‘yicha olib borilayotgan ishlar holatini o‘rganish ishlari olib borildi. Mazkur o‘rganish Toshkent shahar Kengashining navbatdagi sessiyasi kun tartibiga kiritilishi rejalashtirilayotgan masalalarni sessiyaoldi tartibida joyiga chiqib o‘rganish doirasida tashkil etilib, deputatlar saylov okruglarida ijro organlari vakillari bilan birgalikda amalga oshirilayotgan ishlarning amaliy natijalari, mavjud muammolar va ularning yechimlarini tahlil qilmoqda.

📍 Dastlab deputatlar Yakkasaroy tumanida ajrimlarning oldini olishga qaratilgan Mediatsiya markazi faoliyati bilan yaqindan tanishdi. O‘rganishda Toshkent shahar Kengashi deputatlari bilan birgalikda Yakkasaroy tumani hokimi o‘rinbosari D. Rasulmuhamedova hamda markaz direktori D. Kimsanova ishtirok etdi.

🤝 Ma’lum qilinishicha, Yakkasaroy tumani hokimligi hamda Toshkent mediatsiya markazi o‘rtasida 2025-yil dekabr oyida hamkorlik memorandumi imzolangan. Hamkorlik doirasida tumanda istiqomat qiluvchi aholi o‘rtasida yuzaga kelayotgan oilaviy, mulkiy, maishiy va boshqa ijtimoiy xarakterdagi nizolarni tartibli va xolis hal etishga ko‘maklashish maqsadida bepul mediatsiya xizmatlari tashkil etilgan.

👨‍👩‍👧‍👦 Xususan, mediatorlar ishtirokida nizoli hamda ajrim yoqasida turgan oilalar bilan suhbatlar va mediatsiya sessiyalari o‘tkazilib, taraflarni o‘zaro kelishtirish, oilaviy nizolarning oldini olish hamda oiladagi sog‘lom muhitni saqlash bo‘yicha tegishli choralar ko‘rilmoqda. Shuningdek, aholi o‘rtasida mediatsiya bo‘yicha huquqiy madaniyatni oshirish, mediatorlar tomonidan o‘tkaziladigan sessiyalar sifatini monitoring qilish hamda “Pro bono” dasturi samaradorligini muntazam tahlil qilib borish ishlari yo‘lga qo‘yilgan.

⚖️ O‘rganish davomida deputatlar mas’ullarga xotin-qizlarni qo‘llab-quvvatlashga oid amaldagi qonunchilik va tegishli hukumat qarorlarida belgilangan vazifalar ijrosi yuzasidan qator savollar berdi. Jumladan, Vazirlar Mahkamasining 2022-yil 31-martdagi 145-son qarori bilan belgilangan “Ayollar daftari” tizimi doirasida xotin-qizlarning muammolarini aniqlash va hal etish bosqichlari qanday monitoring qilinayotgani, ma’lumotlar bazasining o‘z vaqtida yangilanishi hamda aniqlangan muammolarning manzilli hal etilishi bo‘yicha amalga oshirilayotgan ishlar muhokama qilindi.

🔺 Shuningdek, deputatlar Oila va xotin-qizlar, bandlik, sog‘liqni saqlash, ichki ishlar hamda boshqa mas’ul tuzilmalar o‘rtasidagi hamkorlikning amaldagi holati, ularning vazifalari qay darajada o‘zaro muvofiqlashtirilgani va xotin-qizlarni qo‘llab-quvvatlashga qaratilgan dasturlar ijrosida yagona monitoring tizimini yo‘lga qo‘yish masalalari yuzasidan savollar berdi.

📁 O‘rganish davomida ko‘tarilgan masalalar, mas’ullarning javoblari hamda deputatlarning taklif va tavsiyalari umumlashtirilib, Toshkent shahar Kengashining navbatdagi sessiyasida muhokama qilinishi rejalashtirilayotgan masalalarni puxta tayyorlashda foydalaniladi.

🗣 Oila va xotin-qizlarni qo‘llab-quvvatlash, ularning huquq va manfaatlarini ta’minlash hamda mavjud muammolarni manzilli hal etishga qaratilgan sessiyaoldi o‘rganish ishlari davom etmoqda.

📱 Telegram 📱 Instagram 📱 Facebook 📱 YouTube 🔎 E-kengash