🟢XALQ DEPUTATLARI UCHQUDUQ TUMANI KENGASHI

📌Qonun ijrosi deputatlik nazoratida

Xalq deputatlari Uchquduq tuman Kengashi kotibiyati bosh mutaxassisi T.Xaydarov tomonidan Navoiy mahalla fuqarolar yig‘inida O‘zbekiston Respublikasining “Fuqarolarning o‘z-o‘zini boshqarish organlari to‘g‘risida”gi O‘RQ-350-son Qonuni ijrosi yuzasidan o‘rganish ishlari olib borildi.

O‘rganish davomida fuqarolarning o‘zini o‘zi boshqarish organlari faoliyatini qonunchilik talablari asosida tashkil etish, mahalla fuqarolar yig‘ini tomonidan aholining ijtimoiy muammolarini hal etish, fuqarolarning murojaatlari bilan ishlash, ijtimoiy himoyaga muhtoj oilalarni qo‘llab-quvvatlash, yoshlar va xotin-qizlar bilan olib borilayotgan ishlar, shuningdek, hududda jamoatchilik nazoratini ta’minlash borasida amalga oshirilayotgan ishlar atroflicha tahlil qilindi.

Shuningdek, mahalla fuqarolar yig‘inida hujjatlar yuritilishi, fuqarolar yig‘ini faoliyatining ochiqligi va shaffofligini ta’minlash, davlat organlari hamda jamoat tashkilotlari bilan hamkorlikni yo‘lga qo‘yish, qonun hujjatlarida belgilangan vakolatlarning amalda bajarilishi holatlari ham o‘rganildi.

O‘rganish yakunlari bo‘yicha aniqlangan kamchiliklarni bartaraf etish, qonun talablariga so‘zsiz rioya etish hamda mahalla faoliyati samaradorligini yanada oshirish yuzasidan mas’ullarga tegishli tavsiya va takliflar berildi. Kelgusida qonun ijrosini tizimli nazorat qilib borish hamda mavjud muammolarni o‘z vaqtida bartaraf etish bo‘yicha zarur chora-tadbirlarni amalga oshirish belgilandi.

Xalq deputatlari Uchquduq tuman Kengashi tomonidan hududlarda qonun hujjatlari ijrosi ustidan deputatlik nazoratini kuchaytirish, mahallalar faoliyati samaradorligini oshirish hamda fuqarolarga qulay va sifatli xizmat ko‘rsatishni ta’minlash borasidagi o‘rganishlar izchil davom ettiriladi.