Ǵárezsizligimizdiń 34-jıllıǵı múnásibeti menen respublikamız boylap "Watan ushın, millet ushın, xalıq ushın" súreni astında ótkerilip atırǵan festival sheńberinde Taxtakópir rayonında da keń kólemli ruwxıy-aǵartıwshılıq ilajlar shólkemlestirildi.

Festival baǵdarlamasınan orın alǵan ilajlarda, jaslar hám psixologlar arasında ashıqtan-ashıq sóylesiwler, ruwxıy turaqlılıq hám jeke rawajlanıw temalarında dógerek sáwbetler, 3-sanlı MShBShde balalardıń dóretiwshilik hám intellektuallıq potencialın kórsetiwge xızmet etetuǵın interaktiv oyınlar, saxnalıq kórinisler hám qosıqlar shólkemlestirildi.

Sonday-aq, rayonliq Málimleme resurs orayında “Kitap marafonı” shólkemlestirilip, jıynalǵan miymanlar tárepinen jaslardıń qálbinde kitapqa bolǵan mehirdi oyatıw, kitapqumarlıq mádeniyatın úgit-násiyatlaw, kitap hám kitapqumarlıqqa bolǵan qızıǵıwshılıqtı jáne de kúsheytiw boyınsha pikir-usınıslar bildirildi.