Xalq deputatlari Bo‘stonliq tumani Kengashining 2026-yilga mo‘ljallangan Ish rejasiga muvofiq O‘zbekiston “Milliy tiklanish” demokratik partiyasidan saylangan deputat F.Axmedov va kotibiyat mudiri J.Sadirov tomonlaridan tumanning “Sijjak” mahallasida joylashgan “Sijjak” oilaviy shifokorlik punktida aholiga ko‘rsatilayotgan birlamchi tibbiy-sanitariya xizmatlari sifati, tibbiyot muassasasining moddiy-texnika bazasi hamda bemorlar uchun yaratilgan shart-sharoitlar o‘rganildi.

O‘rganish davomida muassasada aholiga tibbiy xizmat ko‘rsatish jarayoni, tibbiyot xodimlarining faoliyati, qabul xonalari, mavjud jihozlar hamda dori vositalari bilan ta’minlanganlik holati ko‘zdan kechirildi. Shuningdek, tibbiyot xodimlari va fuqarolar bilan suhbat o‘tkazilib, mavjud muammolar yuzasidan ularning fikr va takliflari tinglandi.

O‘rganish natijasida muassasada bir qator kamchiliklar mavjudligi aniqlandi. Xususan, oilaviy shifokorlik punktining ichimlik suvi ta’minoti talab darajasida emasligi tibbiy xizmatlarni uzluksiz tashkil etishda qiyinchiliklarni keltirib chiqarayotgani qayd etildi. Shuningdek, tibbiy xodimlar uchun mavjud xonalar yetarli emasligi sababli ayrim xizmatlarni sifatli tashkil etish imkoniyatlari cheklanayotgani ma’lum bo‘ldi.

Bundan tashqari, zarur turdagi ayrim dori vositalari zaxirasi yetarli emasligi, bu esa bemorlarga tezkor tibbiy yordam ko‘rsatishda muayyan muammolarni keltirib chiqarayotganligi aniqlandi.

Mazkur kamchiliklarni bartaraf etish maqsadida mas’ul tashkilotlarga oilaviy shifokorlik punktini barqaror ichimlik suvi bilan ta’minlash, qo‘shimcha xizmat xonalarini tashkil etish imkoniyatlarini ko‘rib chiqish hamda muassasani zarur dori vositalari bilan to‘liq ta’minlash bo‘yicha deputat so‘rovi chiqarilishi belgilandi.