Xalq deputatlari Bo‘stonliq tumani Kengashining 2026-yilga mo‘ljallangan Ish rejasiga muvofiq O‘zbekiston “Milliy tiklanish” demokratik partiyasidan saylangan deputat M.Aynashova tomonidan tumanning “Pargos” mahallasida aholining tomorqa yerlaridan foydalanish samaradorligi holati hamda hududni obodonlashtirish ishlari yuzasidan o‘rganish ishlari amalga oshirildi.

O‘rganish jarayonida xonadonlar tomorqalarida qishloq xo‘jaligi ekinlarini ekish, sabzavot va poliz mahsulotlari yetishtirish hamda aholining daromadini oshirishga xizmat qiladigan imkoniyatlar tahlil qilindi. Ayrim xonadonlarda tomorqa yerlaridan unumli foydalanilayotgani, mahsulot yetishtirish orqali oilalarning oziq-ovqat xavfsizligi ta’minlanayotgani va qo‘shimcha daromad manbalari yaratilgani e’tirof etildi.

Shu bilan birga, hududda amalga oshirilayotgan obodonlashtirish ishlari ham ko‘zdan kechirildi. Xususan, ichki ko‘chalarning sanitariya holati, yo‘l yoqalarini tartibga keltirish, ariq-zovurlarni tozalash, daraxt va manzarali ko‘chatlarni parvarishlash, yashil hududlarni saqlash hamda aholi tomonidan xonadon oldi hududlarini ozoda saqlash bo‘yicha ishlar o‘rganildi.

O‘rganish davomida aniqlangan ayrim kamchiliklar aholi o‘rtasida tushuntirish ishlarini kuchaytirish hamda obodonlashtirish tadbirlarini tizimli tashkil etish bo‘yicha tegishli tavsiya va takliflar berildi.