Sessiyanı Keńes baslıǵı G.Yusupova basqarıp bardı. Sessiyaǵa rayonlıq Keńes deputatları, Keńes janındaǵı jaslar másláhát toparı, ekspert aǵzaları, hákim orınbasarları, siyasiy partiyalar, rayonlıq mákeme, shólkemler, puqaralar jıyınları hám ǵalaba xabar qurallarınıń wákilleri qatnastı. 

Kún tártibinde dáslep Qaraózek rayonında 2025-jıl dawamında jaslar siyasatı, sociallıq rawajlandırıw hám ruwxıy-aǵartıwshılıq tarawında nızam hám qararlar, mámleketlik baǵdarlamalar tiykarında ámelge asırılǵan jumıslar haqqında rayon hákimi orınbasarı I.Kosibaevtıń esabatı dodalandı. 

Sonday-aq, Ózbekstan Respublikası Prezidentiniń 2023-jıl 28-iyul kúngi 120-sanlı Pármanında belgilengen wazıypalardıń Qaraózek rayonında orınlanıwı haqqında rayonlıq "Insan" sociallıq xızmetler orayı baslıǵı G.Kudaybergenovtıń esabatı kórip shıǵıldı. 

Deputatlardıń usınısları menen sheshimler qabıl etildi. Bunnan soń Qaraózek rayonı jergilikli byudjetiniń 2026-jıl 1-yanvar halatına erkin qaldıq esabınan qarjılardıń bólistiriliwi, Qaraózek rayonı boyınsha 2026-jıl ushın tovarlardıń ayırım túrleri menen usaqlap satıw huqıqı ushın jıyımlardıń sheklengen stavkalarına arttırılatuǵın koefficientlerdi qollanıw hám "Baslamalı byudjet" 2026-jıl birinshi máwsiminde jeńimpaz bolǵan joybarlardı tastıyıqlaw haqqında Qaraózek rayonı ekonomika hám finans bólimi baslıǵı orınbasarı D.Pirniyazovanıń esabat hám usınısları kórip shıǵılıp, deputatlar usınısları menen sheshim qabıl etildi.Sessiya kún tártibindegi 2026-jılda Qaraózek rayonı aymaqların jańasha kóz-qaraslar tiykarında rawajlandırıw arqalı xalıqtıń dáramatın asırıw, turaqlı jumıs orınların jaratıw hám kámbaǵallıqtı qısqartıw ilajları haqqındaǵı baǵdarlaması tiykarında Qaraózek rayonı kámbaǵallıqtı qısqartıw hám bántlikke kómeklesiw bólimi baslıǵı A.Allashovtıń hám Ózbekstan Respublikası Ministrler Kabinetiniń 2024-jıl 11-oktyabr kúngi 665-sanlı qararına tiykar Qaraózek rayonında 2026-jılda qum-shaǵal aralaspalı qaplamaǵa ótkeriliwi belgilengen ishki jollardıń mánzilli dizimin tastıyıqlaw boyınsha rayonlıq abadanlastırıw basqarması baslıǵı orınbasarı Q.Atashevlardıń usınısları dodalanıldı hám sheshim qabıl etildi.Sonday-aq, Ózbekstan Respublikası Prezidentiniń 2025-jıl 12-sentyabr kúngi PP-172-sanlı Pármanınıń orınlanıwın támiyinlew hámde rayon aymaǵında suw támiynatı hám suwǵarıw sistemaların jaqsılaw ilajları hám Ózbekstan Respublikası Prezidentiniń 2026-jıl 5-fevraldaǵı PQ-47-sanlı qararınıń Qaraózek rayonında orınlanıwı haqqında Qaraózek rayonı "Suw jetkerip beriw xızmeti" mámleketlik mákemesi direktorı B.Aytbaevtıń hám Qaraózek rayonı aymaǵındaǵı kóp kvartiralı turaq jaylardıń tutas jer maydanlarında infrastruktura obektlerin qurıw, rekonstrukciyalaw hám kóp kvartiralı jaylardı ońlaw jumısların ámelge asırıw ushın mánzilli dizimi boyınsha Qaraózek rayonlıq qurılıs hám úy-jay kommunal xojalıǵı bólimi baslıǵı Q.Toqsanbaevlardıń usınısları kórip shıǵıldı.

Sessiyada turaqlı komissiyalar tárepinen usınılǵan máseleler tolıǵı menen kórip shıǵılıp, sheshimler qabıl etildi. 

Deputatlar tárepinen kún tártibindegi máseleler boyınsha pikir, usınıslar bildirilip, aldaǵı isleniwi tiyis wazıypalar belgilendi hám sessiya óz jumısın juwmaqladı.