Munosabat

2026-yil — mahallani rivojlantirish va jamiyatni yuksaltirish yili

Bugun Yangi O‘zbekiston taraqqiyotida mahalla institutining o‘rni va ahamiyati tobora ortib bormoqda. 2026-yilning “Mahallani rivojlantirish va jamiyatni yuksaltirish yili” deb e’lon qilinishi ham bu borada amalga oshirilayotgan islohotlarning mantiqiy davomi bo‘lib, xalq bilan muloqotni yanada mustahkamlashga xizmat qiladi.

Mahalla — bu faqat hududiy birlik emas, balki jamiyatimizda o‘zaro mehr-oqibat, hamjihatlik va ijtimoiy adolat qaror topadigan muhim makondir. Ayniqsa, aholining muammolarini o‘z vaqtida aniqlash va hal etish, yoshlar va xotin-qizlar bilan manzilli ishlash, ijtimoiy himoyaga muhtoj oilalarni qo‘llab-quvvatlashda mahallaning roli beqiyosdir.

Navoiy shahrida so‘nggi yillarda mahallalar infratuzilmasini yaxshilash, ichki yo‘llar, ichimlik suvi, elektr va gaz ta’minotini barqarorlashtirish, obodonlashtirish ishlariga alohida e’tibor qaratilmoqda. Shu bilan birga, “raqamli mahalla” tizimini joriy etish orqali fuqarolarning davlat idoralari bilan aloqasi yanada osonlashmoqda.

2026-yilda mahallalarda tadbirkorlikni rivojlantirish, aholi bandligini ta’minlash, ayniqsa, yoshlarni kasb-hunarga yo‘naltirish ustuvor vazifalardan biri bo‘lib qoladi. Chunki yoshlari ish bilan ta’minlangan, faol va tashabbuskor mahalla — barqaror jamiyat poydevoridir.

Xalq deputatlari Navoiy shahar Kengashi deputati sifatida aytishni istardimki, biz uchun eng muhim vazifa — xalq dardi bilan yashash, mahallalardagi muammolarni qonunchilik doirasida hal etish va fuqarolar manfaatini ishonchli himoya qilishdir. Mahallaning rivoji — jamiyatning yuksalishi, jamiyat yuksalishi esa mamlakat taraqqiyotining kafolatidir.

Ishonchim komilki, 2026-yil har bir mahallada yangi imkoniyatlar, yangi tashabbuslar va yangi yutuqlar yili bo‘ladi. Bu yo‘lda davlat idoralari, mahalla faollari va fuqarolarning hamjihatligi eng asosiy omil bo‘lib xizmat qiladi.

🇺🇿Xalq deputatlari Navoiy shahar Kengashi deputati

Murodov Nodirjon Abdulloyevich