Xalq deputatlari Qo‘qon shahar Kengashining "Ijtimoiy soha, yoshlar siyosati, madaniyat va sport masalalari bo‘yicha" doimiy komissiyasi a’zolari tomonidan shahardagi 7-son Bolalar musiqa va san’at maktabida 2026–2027-o‘quv yili uchun qabul jarayonlari yuzasidan o‘rganish ishlari olib borildi.

O‘rganish davomida qabul jarayonining shaffofligi, hujjatlarni qabul qilish tartibi, kirish sinovlarini tashkil etish, o‘quvchilar uchun yaratilgan shart-sharoitlar hamda ota-onalar uchun qulayliklar ko‘zdan kechirildi.

Ma’lum qilinishicha, 2026–2027-o‘quv yilida maktabga 130 nafar o‘quvchini qabul qilish rejalashtirilgan. Nomzodlarni tanlab olish jarayoni amaldagi me’yoriy hujjatlar asosida, ularning qobiliyati va ijodiy salohiyatini xolis baholash tamoyillari asosida tashkil etilmoqda.

Shuningdek, maktabda ta’lim sifati, moddiy-texnik baza, sinf xonalari, musiqa cholg‘ulari bilan ta’minlanganlik hamda o‘quv jarayonini samarali tashkil etish bo‘yicha yaratilgan sharoitlar ham o‘rganildi.

O‘rganish yakunida qabul jarayonlarini ochiq va shaffof tashkil etish, iste’dodli bolalarni saralash hamda ta’lim sifatini yanada oshirish yuzasidan tegishli tavsiya va takliflar bildirildi.

Xalq deputatlari Qo‘qon shahar Kengashi