BOLALARNI DAVLAT MAKTABGACHA TA’LIM TASHKILOTLARIGA QABUL QILISH BO‘YICHA DAVLAT XIZMATLARI KO‘RSATISHNING MA’MURIY REGLAMENTINI TASDIQLASH TO‘G‘RISIDA 2018-yil 28-martdagi 244-son VMQ

Saylovchilar bilan o‘tkazilgan uchrashuvlar davomida bolalarni davlat maktabgacha ta’lim tashkilotlariga qabul qilish, navbat asosida joylashtirish hamda ushbu yo‘nalishda davlat xizmatlarini ko‘rsatish bilan bog‘liq masalalar ko‘tarildi.

Mazkur murojaatlardan kelib chiqib, Xalq deputatlari Chilonzor tumani Kengashi deputati Hidiyatulina Rima Rashitovna tomonidan Chilonzor tumani Maktabgacha va maktab ta’limi bo‘limi mudiri Keldibekov Farhod Uralovichga deputatlik so‘rovi yuborildi.

Deputatlik so‘rovida O‘zbekiston Respublikasi Vazirlar Mahkamasining 2018-yil 28-martdagi 244-son qarori bilan tasdiqlangan “Bolalarni davlat maktabgacha ta’lim tashkilotlariga qabul qilish bo‘yicha davlat xizmatlari ko‘rsatishning ma’muriy reglamenti” talablarining tumandagi ijrosi yuzasidan batafsil ma’lumot taqdim etish so‘ralgan.

Xususan, bolalarni davlat maktabgacha ta’lim tashkilotlariga qabul qilish va navbat asosida joylashtirish jarayonining amaldagi holati, fuqarolardan kelib tushayotgan murojaatlar, ularda ko‘tarilayotgan masalalar hamda ularni hal etish bo‘yicha ko‘rilayotgan choralar haqida ma’lumot so‘raldi.

Shuningdek, Ma’muriy reglament talablarining to‘liq va sifatli bajarilishini ta’minlash, mavjud muammolarni bartaraf etish hamda aholiga ko‘rsatilayotgan davlat xizmatlari sifatini yanada yaxshilash borasida amalga oshirilayotgan ishlar yuzasidan tegishli ma’lumotlarni taqdim etish so‘ralgan.

Deputatlik so‘rovining asosiy maqsadi — saylovchilar tomonidan ko‘tarilgan masalalarni atroflicha o‘rganish, ularning qonuniy yechimiga ko‘maklashish hamda mas’ul tashkilot tomonidan amalga oshirilayotgan ishlar yuzasidan asoslantirilgan ma’lumot olishdan iborat.

Saylovchilar murojaatlari — deputat e’tiborida!