Xalq deputatlari Bag‘dod tumani Kengashining 23-"Qorako‘l" saylov okrugi deputati Sh.Xoldarov, tuman Kengashi kotibiyati mudiri G‘.Abdullayev hamda tuman hokimi X.Isaqov ishtirokida Qorako‘l mahalla fuqarolar yig‘ini hududida qishloq vrachlik punktini tashkil etish masalasi joyida o‘rganildi.

O‘rganish davomida mahallada 5 172 nafar aholi istiqomat qilishi hamda uzoq ko‘chalarda yashovchi fuqarolar, ayniqsa keksalar, nogironligi bo‘lgan shaxslar, homilador ayollar va yosh bolali oilalar uchun birlamchi tibbiy xizmatlardan foydalanishda qator qiyinchiliklar mavjudligi qayd etildi.

Shuningdek, "Adiblar" ko‘chasida joylashgan, mahalla balansidagi qurilishi tugallanmagan bino negizida homiylik mablag‘lari hisobidan qishloq vrachlik punktini tashkil etish ishlari boshlangan bo‘lsada, mazkur obyektni tibbiyot muassasasi sifatida ishga tushirish bilan bog‘liq ayrim tashkiliy va huquqiy masalalar hal etilmagani sababli qurilish ishlari to‘xtab qolgani aniqlandi.

O‘rganish yakunlariga ko‘ra, mazkur masala deputatning "Ko‘chama-ko‘cha aylanish daftari"ga qayd etildi hamda qishloq vrachlik punktini tashkil etish bilan bog‘liq mavjud muammolarni bartaraf etish yuzasidan tuman Tibbiyot birlashmasiga deputat so‘rovi yuborilishi belgilandi.