Fuqarolar murojaatlarini joyiga chiqib o‘rganish, mavjud muammolarni aniqlash va ularni hal etish yuzasidan amaliy choralar ko‘rish deputatlik faoliyatining muhim yo‘nalishlaridan biridir.

Xalq deputatlari Marg‘ilon shahar Kengashining 13-Yoyilma saylov okrugi deputati X.Abdurahmonov tomonidan bu boradagi ishlar izchil davom ettirilmoqda.

Navbatdagi o‘rganish Yoyilma mahalla fuqarolar yig‘inining Asilobod ko‘chasida tashkil etildi. Unda mahalla faollari hamda ko‘chaboshilar X.Qozixo‘jayev, O‘.Otajonov va Kimsanjontog‘a ishtirok etib, hudud aholisini tashvishga solayotgan masalalardan biri – elektr uzatish tarmoqlariga yaqin o‘sgan daraxt shoxlari xavfsizlikka tahdid solayotgani yuzasidan murojaat bildirdilar.

Deputat X.Abdurahmonov murojaatni joyida o‘rganib, mavjud holat bilan yaqindan tanishdi. O‘rganish jarayonida mazkur masalani shahar elektr tarmoqlari korxonasi mutaxassislari ishtirokida atroflicha ko‘rib chiqish, xavfsizlikni ta’minlash hamda muammoni bartaraf etish bo‘yicha tegishli tashkilotlar bilan hamkorlikda zarur choralarni ko‘rish yuzasidan kelishib olindi.

Shuningdek, zarur ruxsatnomalar olingach, elektr tarmoqlariga xavf tug‘dirayotgan daraxt shoxlarini qisqa muddatlarda tartibga keltirish va yuzaga kelishi mumkin bo‘lgan avariya holatlarining oldini olish bo‘yicha amaliy ishlarni tashkil etish belgilandi.

Deputat tomonidan murojaatning nazoratga olinishi va uning ijobiy yechimini ta’minlash yuzasidan olib borilayotgan ishlar aholi manfaatlarini himoya qilish, hududlarda xavfsiz va qulay yashash muhitini yaratishga xizmat qilmoqda. Bu kabi joyiga chiqib o‘rganishlar fuqarolar bilan ochiq muloqotni mustahkamlash hamda ularning muammolarini o‘z vaqtida hal etishda muhim ahamiyat kasb etmoqda.