Xalq deputatlari Chilonzor tumani Kengashi deputati Nazirov Madaminjon Ma’rufjon o‘g‘li tomonidan saylovchilardan kelib tushgan murojaatlar asosida Toshkent shahar IIBB Yo‘l harakati xavfsizligi boshqarmasi boshlig‘iga yuborilgan deputat so‘rovi yuzasidan rasmiy javob olindi.
Javob xatida ma’lum qilinishicha, deputatning 2026-yil 20-iyuldagi №54-ds-413-26-sonli deputat so‘rovi boshqarma mas’ul xodimlari tomonidan atroflicha o‘rganilgan.
O‘rganish jarayonida Chilonzor tumani Naqqoshlik ko‘chasi, Nosirxon masjidi qarshisidagi yo‘l uchastkasida harakat xavfsizligini ta’minlash, tirbandliklarni kamaytirish, yo‘l-transport hodisalarining oldini olish hamda barcha yo‘l harakati ishtirokchilari uchun qulay va xavfsiz sharoit yaratish maqsadida zarur chora-tadbirlar belgilangan.
Xususan, mazkur hududga 3.24 “Tezlik chegaralangan”, 1.21 “Bolalar”, 5.38 “Turar joy dahasi” hamda 5.39 “Turar joy dahasining oxiri” yo‘l belgilarini o‘rnatish bo‘yicha Toshkent shahar Yo‘l harakatini texnik tashkil etish va ekspluatatsiya qilish markaziga tegishli ko‘rsatma berilgani ma’lum qilingan.

Xalq deputatlari Chilonzor tumani Kengashi deputatlari tomonidan saylovchilar murojaatlarida ko‘tarilayotgan masalalar yuzasidan deputat nazorati izchil davom ettiriladi.