Xalq deputatlari viloyat Kengashi deputati G.Bobojonova Bo‘ston va Terakzor mahallalariga tashrif buyurib, mahalla raislari hamda mahalla imomlari ishtirokida oilaviy ajrimlarning oldini olish, oilalar mustahkamligini ta’minlash va sog‘lom ma’naviy muhitni shakllantirish masalalari yuzasidan suhbat o‘tkazdi. Muloqot davomida tumanda oilaviy ajrimlarni keltirib chiqarayotgan asosiy omillar, nizoli oilalar bilan manzilli ishlash, yosh oilalarni har tomonlama qo‘llab-quvvatlash hamda mahalla institutining
bu boradagi o‘rni va mas’uliyati atroflicha muhokama qilindi. Ta’kidlanganidek, oila tinchligi va barqarorligi jamiyat taraqqiyotining muhim omili hisoblanadi. Shu bois mahalla raislari, imomlar, xotin-qizlar faollari va boshqa mutasaddi tashkilotlar
o‘zaro hamkorlikda har bir murojaatni chuqur o‘rganishi, kelishmovchiliklarni erta aniqlab, ularni murosa yo‘li bilan bartaraf etishga alohida e’tibor qaratishi zarurligi qayd etildi. Uchrashuv yakunida aholi o‘rtasida oilaviy qadriyatlarni mustahkamlash, yoshlarni oilaviy hayotga tayyorlash, ma’naviy-ma’rifiy targ‘ibot ishlarini kuchaytirish hamda ajrimlarning oldini olishga qaratilgan hamkorlikni yanada samarali tashkil etish bo‘yicha tegishli vazifalar belgilab olindi.