#_deputat_faoliyati
#_24_ta_masala
Sariosiyoda obodonlashtirish ishlarida deputatlar ham faol ishtirok etmoqda

Prezidentimiz tomonidan belgilab berilgan ustuvor vazifalar ijrosini mahallabay tashkil etish, hududlarni yanada obod va ko‘rkam maskanga aylantirish hamda aholi uchun qulay yashash muhitini yaratish maqsadida Sariosiyo tumanida "Mahalla obodligi va mehr-sahovat oyligi" doirasida keng ko‘lamli obodonlashtirish, ko‘kalamzorlashtirish va sanitariya-tozalash ishlari izchil davom ettirilmoqda.

Mazkur tadbirlar Xalq deputatlari Sariosiyo tumani Kengashining 2026-yilga mo‘ljallangan ish rejasining 41-bandida belgilangan vazifalar ijrosini ta’minlash doirasida ham tashkil etilmoqda. Jarayonda tuman Kengashi deputatlari, mahalla faollari, nuroniylar, Keksalar maslahat guruhi a’zolari, yoshlar hamda keng jamoatchilik vakillari faol ishtirok etib, hududlarni obod etish yo‘lida munosib hissa qo‘shmoqda.

Xalq deputatlari Sariosiyo tumani Kengashining "1-Sangardak" saylov okrugidan saylangan deputat S.Qosimov faol nuroniylar, Keksalar maslahat guruhi a’zolari hamda mahalla faollari ishtirokida xonadonbay va ko‘chabay obodonlashtirish ishlari tashkil etildi.

Hashar davomida ichki ko‘chalar, piyodalar yo‘laklari, ariq va zovurlar chiqindilardan tozalanib, qabristonlar hamda ziyoratgohlar obodonlashtirildi. Shuningdek, daraxtlar va yo‘l bo‘yidagi devorlar oqlanib, hududlarning sanitariya holatini yaxshilash, atrof-muhitni ozoda saqlash hamda ekologik madaniyatni yuksaltirishga qaratilgan amaliy ishlar olib borildi.
Bundan tashqari, ko‘chat ekish, gulzorlar barpo etish, mavjud yashil hududlarni kengaytirish va parvarishlash ishlariga alohida e’tibor qaratildi.

Mahalla aholisining tashabbuskorligi va hamjihatligi bilan amalga oshirilayotgan bunday ezgu tadbirlar hududlarning yanada ko‘rkam qiyofa kasb etishi, ekologik muhitning yaxshilanishi hamda aholi uchun yanada qulay yashash sharoitlarini yaratishga xizmat qilmoqda.

Hududlarni obodonlashtirish va ko‘kalamzorlashtirish borasidagi bunday amaliy ishlar kelgusida ham izchil davom ettirilib, mahallalarning infratuzilmasini yaxshilash, ozodalik va tartibni ta’minlash, fuqarolarning yashash sifatini oshirishga qaratilgan tashabbuslar muntazam qo‘llab-quvvatlanadi.