Xalıq deputatları Bozataw rayonlıq Keńesine 14-Shaxaman saylaw okruginen deputat (ÓzXDP) aǵzası A.Ablakumov, «Kóksuw» APJ hákim járdemshisi R.Bekmuratov hám ryonlıq Sawda-sanaat palatası baslıǵı B.Yusupovlar menen birgelikte «Kóksuw» APJ aymaqta jasaytuǵın puqaralar menen ashıqtan-ashıq sóylesiw ótkerilip, xalıqtı qıynap kiyatırǵan mashqalalar úyrenildi. 

Ushırasıw dawamında puqaralardıń bántlik, isbilermenlikti jolǵa qoyıw, jeńilletilgen kredit alıw, subsidiya ajıratıw, kommunallıq xızmetler, jol, elektr energiyası, ishimlik suwı hám sociallıq qollap-quwatlaw máseleleri boyınsha múrájatları tıńlandı. 

Ásirese, jaslar hám hayal-qızlardı isbilermenlikke tartıw, olardıń dáramat dáregin arttırıw, shańaraqlıq biznesti rawajlandırıw boyınsha ámeliy usınıslar berildi. 

Sawda-sanaat palatasınıń wákili tárepinen isbilermenlik jumısın baslaw, biznes reje tayarlaw hám bar imkaniyatlar haqqında tolıq túsinikler alıp barıldı.

Sonday-aq, hákim járdemshisi tárepinen "temir dápter," "hayal-qızlar dápteri" hám "jaslar dápteri"ne kirgizilgen puqaralardıń mashqalaların sheshiw, olardı jumıs penen támiyinlew hám kásip-ónerge baǵdarlaw boyınsha ámeliy jumıslar dodalandı. 

Deputat tárepinen bolsa xalıqtıń múrájatların nızam sheńberinde sheshiw, juwapker shólkemlerge deputatlıq sorawlar jiberiw hám qadaǵalaw jumısların kúsheytiw boyınsha pikirler bildirildi.

Xalıq penen turaqlı pikirlesiw, olardıń dárti hám mashqalasın tıńlaw - bul eń áhmiyetli wazıypalardan biri. 

Xalıqtıń abadanlıǵın támiyinlew jolında bunday ushırasıwlar turaqlı dawam ettiriledi.