Халқ депутатлари вилоят ва туман (шаҳар) кенгашлари
депутатларининг ҳудудларда куз-қиш мавсумига тайёргарлик ҳолатини ўрганиш
борасидаги фаолиятини ёритиш бўйича 2025 йил октябрь-ноябрь ойларига
мўлжалланган Медиа-режа топшириқлари доирасида Навбаҳор тумани 23-Кескантерак
сайлов округидан сайланган вилоят кенгаши депутати С.Т.Истамов ва 16-Арабхона
сайлов округидан сайланган туман кенгаши депутати Т.Ш.Абдиев томонидан “Бешработ” маҳалласидаги кўп қаватли уйларни
куз-қиш мавсумига тайёргарлик ҳолати ўрганиб чиқилди. 

“Бешработ” маҳалласида жами 18 та кўп қаватли уйлар
бўлиб, улардаги 297 хонадонда 1056 нафар аҳоли истиқомат қилиб келади.  

Мавсумга тайёргарлик юзасидан барча уйларнинг том қисми,
уйларга кириш подъездлари, электр
щитлари таъмирлаб чиқилганлиги, 104 та хонадонга 2 контурли иситиш қозонлари
ўрнатилганлиги ва бу қозонлар ишлатилаётганлиги аниқланди.  

Назорат тариқасида шу уйда яшовчи фуқароларнинг
хонадонларида иситиш аҳволи кўздан кечирилиб, хонадон эгалари билан суҳбатлар
ўтказилди. Аҳоли вакиллари томонидан иситиш мавсумидаги амалга оширилмаган
таъмирлаш ва қайта жиҳозлаш ҳамда бошқа турдаги носозликлар бўйича бирор бир
эътирозлар билдирилмади. 

Маҳалла оқсоқоллари, фаол нуронийлар ва кўчабошилар
томонидан куз-қиш мавсумини беталофат ўтказиш, ҳудудларни ободонлаштириш, яшил
ҳудудни кўпайтириш борасида тарғибот
ишлари олиб борилганлиги кўзга ташланди. Аниқланган айрим кичик камчиликлар
(подъездлардаги электр симлари яқинида бир-икки қуш уялари қолганлиги, электр
кабелларини устига қоплама ўрнатилмаганлиги)ни тугатиш бўйича эслатмалар
берилди.  

Ўрганиш жараёнида ҳамроҳлик қилган туман Архитектура
-қурилиш бўлими бошлиғи Р.Темиров, “Бешработ” маҳалла фуқаролар йиғини раиси
Р.Туманов ҳамда маҳалланинг фаол нуронийси П.Жумаевларга мавсумда юз бериши
мумкин бўлган носозликларни ўз вақтида ва сифатли бартараф этилиши бўйича
жамоатчилик назоратини олиб бориш юзасидан тегишли тавсиялар берилди.