Mamlakatimizda maktabgacha ta’lim qamrovi 27 foizdan 78 foizga, yoshlarimizning oliy ta’lim bilan qamrovi esa 9 foizdan 42 foizga yetganligini amalga oshirilayotgan islohatlarning natijasi sifatida ko‘rish mumkin.

Prezidentimiz nutqi davomida mamlakatimizda maktabgacha ta’lim qamrovi 27 foizdan 78 foizga oshgani, yoshlarimizning oliy ta’lim bilan qamrovi esa 9 foizdan 42 foizga yetganini qayd etdi, shuningdek, eng asosiy jihat sifatida o‘qituvchi va ustozlik kasbining obro‘si va nufuzini keskin oshirishga hal qiluvchi masala sifatida qaralayotganligini alohida ta’kidladi. Ushbu so‘zlar Prezidentimiz tomonidan dunyoning yuksak minbaridan aytilganligi, o‘qituvchilik kasbida faoliyat yuritayotgan har bir fuqaro uchun faxr va iftixor tug‘gusini bag‘ishlaydi.

Abdulla Avloniy nomidagi pedagogik mahorat milliy institutining bino va inshootlari tubdan qayta qurilib, yangilangan holda 2024-yil 1-oktyabr – “O‘qituvchi va murabbiylar kuni” bayrami arafasida o‘qituvchi va murabbiylarga tuhfa etilganligi, ularning o‘z ustida ishlashi, kasbiy rivojlanishi uchun yaratilayotgan sharoitlarning yaqqol namunasi bo‘ldi.

Yana bir tashabbus sifatida, davlatimiz rahbari o‘z nutqi davomida, pedagoglarning o‘zaro tajriba va bilim almashishi uchun yagona xalqaro platformani yaratish maqsadida O‘zbekistonda Butunjahon professional ta’lim sammitini o‘tkazishni taklif etdi. Mazkur tashabbus mamlakatimizdagi pedagoglarning salohiyatini oshirishga, raqobatbardoshligini ta’minlashga, yangiliklardan bahramand bo‘lishiga xizmat qiladi.