Kelajagimiz egalari sog‘lom bo‘lsin!

 

Bugun bolalarning sog‘lom
ovqatlanishi — nafaqat ota-onalar, balki jamiyatimizdagi har bir inson uchun muhim
masala. Shu nuqtai nazardan kelib chiqib, Xalq deputatlari Farg‘ona tuman Kengashi
deputatlari Ozodaxon Dadajonova va Shuxratjon Raximovlar Guliston mahallasidagi
37-sonli davlat maktabgacha ta’lim tashkiloti hamda 100-sonli oilaviy namunaviy MTTda
bo‘lib, bolajonlarning ovqatlanish sharoiti bilan yaqindan tanishdilar. 

Tashrif chog‘ida bolalarga
berilayotgan taomlar sifati, ularning ratsioni, ovqatlanishdagi gigiena qoidalari
ko‘zdan kechirildi. Eng muhimi — deputatlar farzandlarimizning sog‘ligiga jiddiy
tahdid soluvchi fast-fud, gazli va energetik ichimliklar kabi mahsulotlarning zarari
haqida nafaqat ta’lim muassasalari xodimlariga, balki ota-onalar va mahalla ahliga
ham samimiy va ta’sirli tarzda tushuntirish ishlarini olib bordilar. 

Shuningdek, ta’lim tashkilotlari atrofida faoliyat yuritayotgan
savdo nuqtalarida profilaktik suhbatlar o‘tkazilib, bolalar salomatligi yo‘lida
mas’uliyatli bo‘lishga chaqirildi. 

Zero, sog‘lom bola
— sog‘lom millat kelajagi degani. Kelajagimiz egalari barkamol bo‘lishi, ularning
har tomonlama sog‘lom ulg‘ayishi uchun bunday tashabbuslar juda muhim.