Xalq deputatlari Parkent tumani Kengashi deputatlari Uboydullayeva Yulduz Abrorjonovna hamda Yoqubova Xusnora Abduxamidovna tomonidan Parkent tuman axborot-kutubxona markazi faoliyati o‘rganildi. O‘rganish davomida markaz xodimlarining ish jarayoni, kitoblar fondi, kitobxonlar uchun yaratilgan sharoitlar hamda axborot-kutubxona xizmatlari sifati yuzasidan atroflicha muhokamalar olib borildi. Shuningdek, deputatlar tomonidan mamlakatimizda qonunchilik sohasida amalga oshirilayotgan yangiliklar va qabul qilinayotgan me’yoriy-huquqiy hujjatlar mazmun-mohiyati yuzasidan tushuntirishlar berildi. O‘rganish jarayonida muassasa faoliyatining bugungi holati, mavjud imkoniyatlar hamda xizmatlar sifatini yanada oshirish bo‘yicha amalga oshirilayotgan ishlar bilan yaqindan tanishildi. Markaz xodimlari bilan o‘tkazilgan suhbat davomida ayni paytda kutubxonada 52 ming 937 ta kitob mavjudligi, umumiy fond 66 ming 722 tani tashkil etishi hamda kitobxonlar soni 9 ming 427 nafarga yetgani ma’lum qilindi. Shuningdek, uchrashuv davomida muassasa xodimlarining muammo va takliflari tinglanib, axborot-kutubxona markazi faoliyatini yanada rivojlantirish, yoshlarning bo‘sh vaqtini mazmunli tashkil etish hamda ular orasida kitobxonlik madaniyatini keng targ‘ib etish masalalariga alohida e’tibor qaratildi.