Xalq deputatlari Angor tumani Kengashi deputati To‘rayev Norquvvat Tadjimurodovich tomonidan 11–Navro‘z saylov okrugi hududidagi Navro‘z mahallasi fuqarolarining murojaati joyiga chiqib o‘rganilgan edi.

Murojaatda “Zamin Angor Cluster” MChJ zavodi oldidagi yuzga yaqin daraxt uzoq vaqt davomida sug‘orilmay, qurib borayotgani hamda mahalla ichki ariqlariga suv yetib kelmayotgani sababli fuqarolarning tomorqa yerlarini sug‘orishda muammolar yuzaga kelayotgani bildirilgan.

Mazkur holat yuzasidan deputat tomonidan mas’ul tashkilotga deputatlik so‘rovi yuborilib, hududni sug‘orish suvi bilan ta’minlash, daraxtlarni asrab qolish va tomorqalarga suv yetkazib berish choralarini ko‘rish so‘ralgan.

Deputatlik so‘roviga Angor tuman “Suv yetkazib berish xizmati” davlat muassasasidan javob kelib, o‘rganish natijasida bugungi kunda “Navro‘z” mahallasi ichki ariqlarida suv mavjudligi, shuningdek, “Zamin Angor Cluster” MChJ yer maydoniga ekilgan daraxtzorlar sug‘orilayotgani ma’lum qilindi.

✅ Shu tariqa, fuqarolar murojaati yuzasidan amaliy choralar ko‘rilib, masala ijobiy hal etildi.

Xalq deputatlari Angor tumani Kengashi deputatlari fuqarolar murojaatlarini joyida o‘rganish, ularning qonuniy va amaliy yechimini ta’minlash hamda deputatlik nazoratini izchil davom ettiradi.